1993 թվականի հոկտեմբերի 14-ին ՄԱԿ Անվտանգության խորհուրդն իր 3292-րդ նիստում ընդունեց թիվ 874 նոր բանաձևը, որով հակամարտության կողմերին կոչ էր անում կատարել 822-րդ և 853-րդ բանաձևերի պահանջները, և պահանջում է հակամարտությունը բանակցություններով լուծելու համար հրավիրել ԵԱՀԽ կողմից առաջարկված Մինսկի կոնֆերանսը:
ՄԱԿ Անվտանգության խորհրդի 874 (1993) բանաձև
14-ը հոկտեմբերի, 1993 թվական
Անվտանգության խորհուրդը
Վերահաստատելով 1993 թվականի ապրիլի 30-ի իր 822 (1993) և հուլիսի 29-ի 853 (1993) բանաձևերը և մտաբերելով 1993 թվականի օգոստոսի 18-ին Անվտանգության խորհրդի նախագահողի ընթերցած հայտարարությունը,
Քննարկելով Եվրոպայում անվտանգության և համագործակցության խորհրդակցության Մինսկի խմբի նախագահի կողմից Անվտանգության խորհրդի նախագահի անվամբ 1993 թվականի հոկտեմբերի 1-ին ուղղարկված նամակը,
Հայտնելով իր լուրջ մտահոգությունն այն առթիվ, որ Ադրբեջանական Հանրապետության Լեռնային Ղարաբաղի տարածաշրջանում և դրա շուրջ հակամարտության շարունակությունը և Հայաստանի Հանրապետության ու Ադրբեջանական Հանրապետության միջև հարաբերությունների լարվածությունը կարող են տարածաշրջանում խաղաղության ու անվտանգության սպառնալիք դառնալ,
Ընդգծելով 1993 թվականի հոկտեմբերի 8-ին Մոսկվայում կայացած բարձր մակարդակով հանդիպումները և հույս հայտնելով, որ դրանք կարող են նպաստել իրավիճակի բարելավմանն ու հակամարտության խաղաղ կարգավորմանը,
Վերահաստատելով Ադրբեջանի և տարածաշրջանի մյուս բոլոր երկրների ինքնիշխանությունն ու տարածքային ամբողջականությունը,
Վերահաստատելով նաև միջազգային սահմանների անխախտելիությունն ու ուժի կիրառմամբ տարածքներ ձեքռբերելու անթույլատրելիությունը,
Վերստին արտահայտելով իր խորը մտահոգությունը հակամարտության հետևանքով մարդկանց տառապանքների և տարածաշրջանում հումանիտար արտակարգ իրավիճակի առթիվ և մասնավորապես հայտնելով իր խորը մտահոգությունը Ադրբեջանում մեծ թվով քաղաքացիական անձանց տեղահանության առթիվ,
- Կոչ է անում շահագրգիռ կողմերին՝ Եվրոպայում անվտանգության և համագործակցության խորհրդակցության Մինսկի խմբին ի աջակցություն Ռուսաստանի Դաշնության կառավարության աջակցությամբ ձեռնարկված ուղիղ շփումների արդյունքում հաստատված հրադադարը դարձնել մշտական ու արդյունավետ,
- Վերստին իր լիակատար աջակցությունն է հայտնում Եվրոպայում անվտանգության և համագործակցության խորհրդակցության շրջանակներում ընթացող խաղաղ գործընթացին, ինչպես նաև Մինսկի խմբի աննկուն ջանքերին,
- Ողջունում և կողմերի ուշադրությունն է հրավիրում ԵԱՀԽ Մինսկի խմբի կողմից 1993 թվականի սեպտեմբերի 28-ին կայացած խորհրդակցության ընթացքում պատրաստված և Խմբի նախագահի կողմից այդ Խմբի ինն այլ անդամների համապարփակ աջակցությամբ շահագրգիռ կողմերի ներկայացուցիչներին ներկայացված «Անվտանգության խորհրդի 822 (1993) և 853 (1993) բանաձևերի իրականացման անհետաձգելի միջոցառումների նորացված ժամանակացույցի» վրա, և կոչ է անում կողմերին՝ ընդունել այն,
- Համոզմունք է հայտնում, որ հակամարտությունից բխող և «Նորացված ժամանակացույցի» մեջ ուղղակիորեն չընդգրկված մնացած բոլոր չկարգավորված հարցերն անհրաժեշտ է արագ լուծել Մինսկի գործընթացի ներքո խաղաղ բանակցությունների շրջանակներում,
- Կոչ է անում անմիջապես իրականացնել Մինսկի խմբի «Նորացված ժամանակացույցով» նախատեսված փոխադարձ ու անհետաձգելի միջոցառումները, այդ թվում՝ վերջերս բռնազավթված տարածքներից ուժի դուսրբերումն ու տրանսպորտի և հաղորդակցության առջև եղած բոլոր խոչընդոտների վերացումը,
- Կոչ է անում նաև Եվրոպայում անվտանգության և համագործակցության խորհրդակցության Նախարարների կոմիտեյում 1992 թվականի մարռտի 24-ին տրված մանդատի համաձայն՝ հակամարտությունը բանակցությունների միջոցով լուծելու համար արագ հրավիրել Մինսկի կոնֆերանսը, ինչպես նախատեսված է «Նորացված ժամանակացույցի» մեջ,
- Խնդրում է Գլխավոր քարտուղարին դրական արձագանքել Մինսկի կոնֆերանսին մասնակցելու համար ներկայացուցիչ ուղարկելու առաջարկին և իր հնարավոր օժանդակությունը ցուցաբերել Կոնֆերանսի բացումից հետո ըստ խնդրի էության բանակցությունների վարելու համար,
- Աջակցություն է ցուցաբերում Եվրոպայում անվտանգության և համագործակցության խորհրդակցության կողմից ձևավորված դիտարկման առաքելությանը,
- Կոչ է անում բոլոր ոկղմերին՝ ձեռնպահ մնալ միջազգային հումանիտար իրավունքի խախտումներից և վերահաստատում է 822 (1993) և 853 (1993) բանաձևերում ամրագրված իր կոչը՝ ավահովել հակամարտությունը ներառող բոլոր շրջաններում հումանիտար օգնություն ցուցաբերող միջազգային գործունեության անխափան իրականացումը,
- Վճռականորեն կոչ է անում տարածաշրջանի բոլոր երկրներին՝ ձեռնպահ մնալ ամեն տեսակ թշնամական գործողություններից և ցանկացած միջամտությունից կամ ներխուժումից, որոնք կարող են բերել հակամարտության թեժացմանը և կարող են վտանգել տարածաշրջանում խաղաղությունը և անվտանգությունը,
- Խնդրում է Գլխավոր քարտուղարին և համապատասխան միջազգային կառույցներին՝ տուժած քաղաքացիական բնակչությանը տրամադրել անհապաղ հումանիտար օգնություն և օգնել փախստականներին ու ներքին տեղահանված անձանց՝ արժանապատիվ կերպով ու անվտանգ պայմաններում վերադառնալ իրենց տները,
- Խնդրում է Գլխավոր քարտուղարին, Եվրոպայում անվտանգության և համագործակցության խորհրդակցության Գործող նախագահողին և Մինսկի կոնֆերանսի նախագահին՝ շարունակել Խորհրդին ներկայացնել զեկույցներ Մինսկի գործընթացի և տեղում իրավիճակի տարբեր ասպեկտների, ինչպես նաև Միավորված ազգերի կազմակերպության և Եվրոպայում անվտանգության ու համագործակցության խորհրդակցության միջև ընթացիկ և ապագա համագործակցության մասին,
- Որոշում է շարունակել ակտիվ զբաղվել այս խնդրով: