ՄԱԿ ԱԽ 822 բանաձևը ԼՂ վերաբերյալ

Քաշաթաղի շրջանում ԼՂՀ Պաշտպանության բանակի հաջող գործողություններից հետո 1993 թվականի ապրիլի 30-ին ՄԱԿ Անվտանգության խորհուրդն իր 3205 նիստում Լեռնային Ղարաբաղի հակամարտության վերաբերյալ բանաձև ընդունեց: Փաստաթղթի քվեարկությանը մասնակցեցին ՄԱԿ ԱԽ այդ ժամանակվա կազմի բոլոր անդամները և միաձայն կողմ քվեարկեցին: Նրանք էին՝ Բրազիլիան, Կաբու Վերդին, Չինաստանը, Ջիբութին, Ֆրանսիան, Հունգարիան, Ճապոնիան, Մարոկկոն, Նոր Զելանդիան, Պակիստանը, Ռուսաստանը, Իսպանիան, Միացյալ Թագավորությունը, Միացյալ Նահանգները, Վենեսուելան:

ՄԱԿ Անվտանգության խորհրդի թիվ 822 (1993) բանաձև
30-ը ապրիլի, 1993 թվական

Անվտանգության խորհուրդը,

Վկայակոչելով Անվտանգության խորհրդի նախագահի կողմից Լեռնային Ղարաբաղի հակամարտության վերաբերյալ 1993 թվականի հունվարի 29-ին և ապրիլի 6-ին կատարված հայտարարությունները,

Նկատի ունենալով Գլխավոր քարտուղարի 1993 թվականի ապրիլի 14-ի զեկույցը,

Հայտնելով իր խորը մտահոգությունը Հայաստանի Հանրապետության և Ադրբեջանի Հանրապետության միջև հարաբերությունների վատթարացման առնչությամբ,

Մտահոգությամբ ընդգծելով ռազմական գործողությունների էսկալացիան, մասնավորապես տեղի հայկական ուժերի կողմից Ադրբեջանի Քելբաջարի շրջան ներխուժումը,

Անհանգստանալով, որ այդ իրավիճակը սպառնում է տարածաշրջանի խաղաղությանն ու անվտանգությանը,

Լուրջ մտահոգություն հայտնելով մեծ քանակությամբ քաղաքացիական անձանց տեղահանման և տարածաշրջանում արտակարգ հումանիտար իրավիճակի առնչությամբ, հատկապես Քելբաջարի շրջանում,

Վերահաստատելով տարածաշրջանի երկրների ինքնիշխանության և տարածքային ամբողջականության նկատմամբ հարգանքը,

Վերահաստատելով նաև միջազգային սահմանների անխախտելիությունն ու տարածքներ ձեռք բերելու նպատակով ուժի կիրառման անթույլատրելիությունը,

Հայտնելով իր աջակցությունը Եվրոպայում անվտանգության և համագործակցության խորհրդի շրջանակներում ընթացող խաղաղ գործընթացին, և խորապես անհանգստացած լինելով այդ գործընթացի վրա ռազմական գործողությունների էսկալացիայի պատճառով հնարավոր կործանարար հետևանքներով,

1. Պահանջում է ամուր հրադադար հաստատելու նպատակով բոլոր ռազմական և թշնամական գործողությունների անհապաղ դադարեցում, ինչպես նաև օկուպացիոն ուժերի դուրս բերում Քելբաջարի շրջանից և Ադրբեջանի վերջերս օկուպացված այլ շրջաններից,

2. Վճռականորեն կոչ է անում շահագրգիռ կողմերին անհապաղ վերականգնել հակամարտության լուծման նպատակով Եվրոպայում անվտանգության և համագործակցության խորհրդի Մինսկի խմբի խաղաղ գործընթացի շրջանակներում տարվող բանակցությունները և ձեռնպահ մնալ ցանկացած գործողությունից, որը կդժվարացնի հիմնախնդրի խաղաղ կարգավորումը,

3. Կոչ է անում ապահովել տարածաշրջանում հումանիտար օգնություն ցուցաբերելու համար միջազգային գործունեության անվերապահ իրականացում, մասնավորապես հակամարտության գոտի հանդիսացած բոլոր շրջաններում, որպեսզի մեղմվեն քաղաքացիական բնակչության տառապանքները, և վերստին հաստատում է, որ բոլոր կողմերը պարտավոր են հարգել միջազգային հումանիտար իրավունքի սկզբունքներն ու նորմերը,

4. Խնդրում է Գլխավոր քարտուղարին Եվրոպայում անվտանգության և համագործակցության խորհրդի Գործող նախագահողի, ինչպես նաև մինսկի խմբի նախագահի հետ խորհրդակցությունների միջոցով գնահատի իրավիճակը տարածաշրջանում, մասնավորապես Քելբաջարի շրջանում, և Խորհրդին ներկայացնի համապատասխան զեկույց,

5.Որոշում է շարունակել այս հարցով ակտիվ զբաղվել:

Փաստաթղթի բնօրինակը՝ ՄԱԿ պաշտոնական կայքից

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.