1993 թվականի հուլիսի 29-ին ՄԱԿ Անվտանգության խորհուրդն իր 3259-րդ նիստում ընդունեց թիվ 853 նոր բանաձևը, որով հակամարտության կողմերին կոչ էր անում կատարել 822-րդ բանաձևի պահանջները, դատապարտում էր Ադրբեջանին հայաբնակ շրջանների ռմբակոծման և քաղաքացիական բնակչության վրա հարձակումների համար և որպես պատասխան քայլ՝ հայկական ուժերի կողմից Աղդամ քաղաքի գրավումը։
ՄԱԿ Անվտանգության խորհրդի թիվ 853(1993) բանաձև
29-ը հուլիսի, 1993 թվական
Անվտանգության խորհուրդը
Վերահաստատելով 1993 թվականի ապրիլի 30-ի իր 822 (1993) բանաձևը,
Քննարկելով Եվրոպայում անվտանգության և համագործակցության խորհրդի Մինսկի խմբի նախագահի 1993 թվականի հուլիսի 27-ի զեկույցը,
Խիստ մտահոգություն հայտնելով Հայաստանի Հանրապետության և Ադրբեջանական Հանրապետության միջև հարաբերությունների սրման և նրանց միջև լարվածության աճի առթիվ,
Ողջունելով շահագրգիռ կողմերի կողմից իր 822 (1993) բանաձևի կատարման համար անհետաձգելի միջոցառումների պլանի ընդունումը,
Տագնապով ընդգծելով ռազմական գործողությունների էսկալացիան, մասնավորապես, Ադրբեջանում Աղդամի շրջանի գրավումը,
Մտահոգված լինելով, որ այդ իրավիճակը շարունակում է սպառնալ տարածաշրջանում խաղաղությանն ու անվտանգությանը,
Վերստին խիստ մտահոգություն է հայտնել կապված Ադրբեջանում քաղաքացիական անձանց մեծ քանակի տեղաշարժի և տարածաշրջանում արտակարգ հումանիտար իրավիճակի կապակցությամբ,
Վերստին հաստատել է Ադրբեջանի և տարածաշրջանի մյուս երկրների ինքնիշխանությունը և տարածքային ամբողջականությունը,
Վերստին հաստատել է նաև միջազգային սահմանների անխախտելիությունն ու տարածքներ ձեռքբերելու նպատակով ուժի կիրառման անթույլատրելիությունը,
- Դատապարտում է Աղդամի շրջանի և Ադրբեջանական Հանրապետության վերջերս բռնազավթված այլ շրջանների գրավումը,
- Դատապարտում է նաև տարածաշրջանում թշնամական բոլոր գործողությունները, մասնավորապես հարձակումները քաղաքացիական անձանց վրա և բնակավայրերի ռմբակոծություններն ու հրետակոծությունները,
- Պահանջում է ամեն տեսակ ռազմական գործողությունների անվերապահ դադարեցում և հակամարտության մասնակցող օկուպացիոն զորքերի անմիջապես, լիովին ու անվերապահ դուրս բերում Աղդամի շրջանից և Ադրբեջանի մյուս բոլոր բռնազավթված շրջաններից,
- Կոչ է անում շահագրգիռ կողմերին հասնել հրադադարի հաստատման և այն հարգելու վերաբերյալ ամուր համաձայնության,
- Վերստին հաստատում է՝ վերը շարադրված 3-րդ և 4-րդ կետերի համատեքստում, իր նախորդ կոչերը՝ վերականգնել տարածաշրջանում տնտեսական, տրանսպորտային և էներգետիկ կապերը,
- Հավանության է արժանացնում Եվրոպայում անվտանգության և համագործակցության խորհրդի Մինսկի խմբի շարունակական ջանքերին՝ ուղղված հակամարտության խաղաղ կարգավորման ապահովմանը, այդ թվում 822 (1993) բանաձևի կատարման ուղղությամբ ջանքերը, և խիստ մտահոգություն է հայտնում այդ ջանքերին խորապես վնասող ռազմական գործողությունների էսկալացիայի առթիվ,
- Ողջունում է Եվրոպայում անվտանգության և համագործակցության խորհրդի դիտարկման առաքելության, այդ թվում դրա տեղակայման ժամանակացույցի նախապատրաստումը, ինչպես նաև Խորհրդի շրջանակներում տարածաշրջանում Խորհրդի ներկայության ապահովման առաջարկի քննարկումը,
- Վճռականորեն կոչ է անում շահագրգիռ կողմերին՝ ձեռնպահ մնալ ցանկացած գործողություններից, որոնք խոչընդոտում են հակամարտության խաղաղ կարգավորմանը, և շարունակել բանակցությունները Մինսկի խմբի շրջանակներում, ինչպես նաև միմյանց միջև ուղղակի շփումների միջոցով՝ նպատակ ունենալով հասնել վերջնական կարգավորման,
- Վճռականորեն կոչ է անում Հայաստանի Հանրապետության կառավարությանը՝ շարունակել կիրառել իր ազդեցությունը՝ Ադրբեջանի Լեռնային Ղարաբաղի տարածաշրջանի հայերի կողմից 822 (1993) բանաձևի և սույն բանաձևի պահանջները կատարելու, և նրանց կողմից Մինսկի խմբի առաջարկներն ընդունելու նպատակով,
- Վճռականորեն կոչ է անում պետություններին՝ ձեռնպահ մնալ ամեն տեսակ սպառազինության ու ռազմական գույքի մատակարարումից, որոնք կարող են հանգեցնել հակամարտության էսկալացիայի կամ տարածքների բռնազավթման շարունակման,
- Վերստին կոչ է անում ապահովել տարածաշրջանում հումանիտար օգնության միջազգային գործունեության անխափան իրականացումը, մասնավորապես հակամարտության շրջաններում, որպեսզի մեղմվեն քաղաքացիական բնակչության աճող տառապանքները, ու վերահաստատում է, որ բոլոր կողմերը պարտավոր են հարգել միջազգային հումանիտար իրավունքի սկզբունքներն ու նորմերը,
- Խնդրում է Գլխավոր քարտուղարին և համապատասխան միջազգային կառույցներին՝ տուժած քաղաքացիական բնակչությանը տրամադրել անհապաղ հումանիտար օգնություն և տեղահանված անձանց օգնել՝ վերադառնալու իրենց տները,
- Խնդրում է Գլխավոր քարտուղարին՝ Եվրոպայում անվտանգության և համագործակցության խորհրդակցությունում նախագահողի և Մինսկի խմբի նախագահի հետ խորհրդակցությունների միջոցով Խորհրդին զեկուցի իրավիճակի զարգացման մասին,
- Որոշում է ակտիվ զբաղվել այս խնդրով: