Հովիկ Աբրահամյանի հրաժարականը Կարեն Կարապետյանի՝ վարչապետի պաշտոնում գործունեության հեռանկարները մեկնաբանում է «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը:
– Պարոն Մանասերյան, երեկ ՀՀԿ ԳՄ նիստի ժամանակ նախագահը նշեց, որ Հովիկ Աբրահամյանի պաշտոնավարման տարիները հաջողված էին, այս դեպքում, ինչո՞վ է ըստ Ձեզ պայմանավորված նրա հրաժարականը:
– Լավ ավանդույթ է, երբ վարչապետի փոփոխության ժամանակ ոչ թե նսեմացվում է արված աշխատանքը, այլ գնահատվում: Դա ավանդույթի պես փոխանցվում է հաջորդ վարչապետին, որպեսզի նա կարողանա գնահատել ստացած ժառանգությունը: Հենց այս հիմքի վրա է, որ կարելի է կառուցել ապագա տեսլականին հասնելու քայլերը և այս տեսանկյունից, իսկապես, ինչպես ցանկացած նախորդ կառավարության, Հովիկ Աբրահամյանի կառավարության քայլերը ևս պետք է արժանանան ուշադրության:
– Ինչո՞վ է այս դեպքում պայմանավորված փոփոխությունը: Սա անձի խնդիր է, թե՞ համակարգային փոփոխության:
– Նախագահն ընդգծեց, որ արհեստավարժ կառավարությունը պետք է դիմակայի ժամանակի մարտահրավերներին, ուստի պետք է գտնել ավելի որակյալ համակարգ: Այս դեպքում, կարծում եմ, Հայաստանում և անձերի (խոսքը նախարարների մասին է), և հանրային կառավարման համակարգի փոփոխության անհրաժեշտություն միշտ էլ զգացվում է: Այս տեսանկյունից, կարծում եմ, որ նոր կառավարությունից ակնկալիքները և նաև պատասխանատվության բեռը բավականին մեծ է լինելու:
– Ըստ Ձեզ, որքանո՞վ կարդարացնի Կարեն Կարապետյանն այդ ակնկալիքները:
– Կարապետյանի փորձն ու գիտելիքները, ինչպես միկրո մակարդակում, այնպես էլ մակրո մակարդակում բավականին զգալի են և լուրջ հիմք են հանդիսանում լավատեսության: Ոչ միայն Հայաստանի, այլ նաև միջազգային մասշտաբով Կարապետյանը քաջատեղյակ է գլոբալ զարգացումներին, տարածաշրջանային և գործնական աշխատանքին: Նա մեծ փորձ ունի և պրոֆեսիոնալ կառավարիչ է, ուստի ուզում եմ հավատալ, որ հատկապես կադրային քաղաքականության հարցում ճիշտ ընտրություն կարվի, իսկ եղած կադրերի հետ էլ, ովքեր նախարարների պաշտոնում կշարունակեն պաշտոնավարել, Կարապետյանը կբերի իր աշխատելաոճը, ինչը կարող է նպաստել տնտեսության զարգացմանը:
Հաշվի առնելով, որ Կարապետյանը նաև գիտնական է, տնտեսագիտության դոկտոր և բավական կարևոր ներդրում ունի էներգետիկ անվտանգության ոլորտում՝ ուզում եմ վստահ լինել, որ կտարվեն բոլոր անհրաժեշտ աշխատանքները Հայաստանում առկա տնտեսական անվտանգության խնդիրները լուծելու և սպառնալիքները վնասազերծելու ուղղությամբ: Հենց այս քայլերն են, որ հիմք կդառնան տնտեսական առաջընթացի համար: