ԱԺ նախկին պատգամավոր Կարեն Բեքարյանի գրառումն ի պատասխան Փաշինյանի «Մյունխենյան սկզբունքների»
Սկզբունքներ (ոչ ամբողջական ցանկ), որոնք չի կարելի մոռանալ՝ «Մյունխենյան անսկզբունքայնությամբ» չտառապելու համար
1. Լեռնային Ղարաբաղի Հանրապետությունն իր անկախությունը ձեռք է բերել անխոցելի իրավական գործընթացի արդյունքում:
2. Լեռնային Ղարաբաղի Հանրապետությունը հակամարտության և դրա կարգավորման գործընթացի լիիրավ կողմ է, և հնարավոր չէ լուծել կոնֆլիկտը, առանց՝ գործընթացի բոլոր փուլերում Արցախի լիարժեք մասնակցության:
3. Արցախի և Ադրբեջանի սահմաններին առնչվող հարցերը կարող են քննարկման առարկա լինել Արցախի և Ադրբեջանի միջև՝ Ադրբեջանի կողմից Արցախի ինքնորոշման իրավունքի իրացումը ճանաչելուց և միջազգայնորեն երաշխավորված անվտանգության մեխանիզմների լիարժեք ներդրումից հետո միայն:
4. Հաշվի առնելով կողմերի միջև վստահության բացակայությունը, պայմանավորված այդ թվում՝ Ադրբեջանի 2016 թվականին նախաձեռնած պատերազմով, ծանրագույն ռազմական հանցագործություններով, թշնամանքի քարոզով, հայաֆոբիայի ակնհայտ դրսևորումներով, ուժի և ուժի սպառնալիքի մշտական կիրառմամբ, հնարավոր չէ կոնֆլիկտը լուծել փուլային տարբերակով:
5. Հարցի լուծման որևէ առաջարկ կամ նախագիծ չի կարող անտեսել Արցախի ինքնորոշման իրավունքն ու դրա իրացումը: Ադրբեջանի համար պետք է հստակ լինի, որ իրավունքը սակարկման առարկա չէ:
6. ԼՂ հարցը չունի ռազմական լուծում: Հայաստանն Արցախի անվտանգության երաշխավորն է, հայ ժողովրդի համար միանշանակ է՝ Արցախը չի կարող լինել Ադրբեջանի կազմում:
Հ.Գ. ՀՀ Սահմանադրության ի՞նչ փոփոխություններ է անհրաժեշտ կատարել, որպեսզի հետագայում անհնար լինեն մյունխենյան խայտառակությունները…