Եռօրյա քննարկումների արդյունքները

Հայաստանի և Ադրբեջանի արտաքին գործերի նախարարների և ԵԱՀԿ Մինսկի խմբի համանախագահների համատեղ հայտարարությունը

Ժնև, Շվեյցարիա, 30-ը հունվարի 2020

ԵԱՀԿ Մինսկի խմբի համանախագահները (Ռուսաստանի Դաշնությունից Իգոր Պոպովը, Ֆրանսիայից Ստեֆան Վիսկոնտին, Ամերիկայի Միացյալ Նահանգներից Էնդրյու Շոֆերը) հունվարի 28-30-ին Ժնևում առանձին և համատեղ հանդիպումներ ունեցան Հայաստանի արտաքին գործերի նախարար Զոհրաբ Մնացականյանի և Ադրբեջանի արտաքին գործերի նախարար Էլմար Մամեդյարովի հետ։ Հանդիպումներին մասնակցություն ունեցավ ԵԱՀԿ Գործող նախագահողի անձնական ներկայացուցիչ Անջեյ Կասպրչիկը։

Եռօրյա ինտենսիվ քննարկումների ընթացքում համանախագահներն ու նախարարները քննարկեցին օրակարգային հետևյալ հարցերը. 2019-ին քննարկված համաձայնությունների ու առաջարկների իրագործումն ու ժողովուրդներին խաղաղության նախապատրաստելու ուղղությամբ հնարավոր հաջորդ քայլերը, ապագա կարգավորման հիմքը հանդիսացող սկզբունքներն ու տարրերը, և կարգավորման գործընթացի առաջմղման ժամանակացույցն ու օրակարգը։

Համանախագահները վերահաստատեցին հակամարտության խաղաղ կարգավորման որոնումների գործում կողմերին օժանդակելու, և կարգավորման գործընթացում գաղտնիության սկզբունքի նկատմամբ իրենց լիակատար հանձնառությունը, ինչպես նաև արդար և տևական խաղաղության հասնելու համար ստեղծագործ մոտեցման ու փոխզիջման ոգու անհրաժեշտությունը։

Նախարարները համաձայնեցին մոտ ապագայում համանախագահների հովանու ներքո կրկին հանդիպել։

Հայտարարության բնօրինակը ԵԱՀԿ պաշտոնական կայքում