Շնորհավորանք 100-ամյակի առթիվ

ՀՀ Երրորդ նախագահ Սերժ Սարգսյանը շնորհավորական ուղերձ է հղել ԵՊՀ հիմնադրման 100-ամյակի առթիվ։ Ուղերձում ասված է.

Հարգելի՛ պարոն Սիմոնյան,

Շնորհավորում եմ Ձեզ, Երևանի պետական համալսարանի պրոֆեսորասդասախոսական անձնակազմին, ուսանողներին և Մայր բուհի բոլոր շրջանավարտներին` Երևանի պետական համալսարանի հիմնադրման 100-ամյակի առթիվ: 

Մայր բուհը իր կայացման և զարգացման մեկդարյա նշանակալի ճանապարհը` լի դժվարություններով և ակնառու հաջողություններով, անկասկած, պատվով է անցել: Այսօր արժանին պետք է մատուցել Երևանի պետական համալսարանի հիմնադիրներին և բուհի կայացման ու զարգացման գործում իրենց մեծ ներդրումն ունեցած բոլոր նվիրյալներին: Հիմնվելով Հայաստանի առաջին Հանրապետության բարդ ու դժվարություններով լի ժամանակաշրջանում`  համալսարանը կայացավ և զարգացավ Խորհրդային Հայաստանի շրջանում, իսկ Հայաստանի Հանրապետության անկախության հռչակումից հետո շարունակեց իր կարևոր, հայրենանվեր առաքելությունը` դառնալով մեր ժողովրդի հավերժական ուղու վերջին 100-ամյակի կերտման ակտիվ մասնակիցն ու վկան:  Մայր բուհի հազարավոր շրջանավարտներ անցած տասնամյակների ընթացքում հսկայական ներդրում են ունեցել Հայաստանի հանրային կյանքի կարևորագույն ոլորտներում, մեծ ճանաչում և հեղինակություն բերել մեր երկրին ու ժողովրդին նաև միջազգային ասպարեզում: 

Վստահ եմ, որ Մայր բուհը, ինչպես նախկինում, այսօր էլ պատասխանատվությամբ և պատվով կհաղթահարի ժամանակի փորձությունները, ճիշտ կընկալի արդի մարտահրավերները, զարգացման ու բարեփոխումների պահանջները և անվարան առաջ կընթանա դեպի նոր հարյուրամյակ: 

Ուղերձի տեքստը՝ Երրորդ նախագահի պաշտոնական կայքում