Բռնություններ քրիստոնյաների հանդեպ

«Բաց դռներ» ավետարանական կազմակերպության քրիստոնյաների հետապնդման ցուցիչի համաձայն 2018թ.-ին սպանվել է 4000 հավատացյալ՝ հազարով ավելին, քան նախորդ տարի էր։ Հալածող երկրների ցուցակում առաջին տեղը զբաղեցնում է Հյուսիսային Կորեան։

«Բաց դռներ» ավետարանական իրավապաշտպան հասարակական կազմակերպությունը հրապարակել է քրիստոնյաների հետապնդման ամենամյա համաշխարհային ցուցիչը։ Ըստ կազմակերպության տվյալների, 2018թ.-ին կրոնական բռնությունների աճը մոտ 50 երկրներում լրջորեն վատթարացրել է քրիստոնայների վիճակը։ Հիմնվելով իր 60 տեղական գրասենյակների տեղեկությունների վրա՝ ՀԿ-ն գրանցել է 4165 քրիստոնյաների սպանություն (2017թ.-ին 3066 մարդ էր)։ Անցյալ տարի հանցագործությունների մեծ մասը տեղի է ունեցել Նիգերիայում, որտեղ Բոկո Հարամ ջիհադիստական խմբի և երկրի հարավում միգրացիայի պատճառով 3731 քրիստոնյա է զոհվել։

Նույն տագնապալի իրավիճակն է Աֆղանստանում, Սոմալիում, Լիբիայում, Պակիստանում և Սուդանում։ «Իսլամական ծայրահեղականությունը քրիստոնյաների նկատմամբ բռնության հիմնական պատճառներից մեկն է,— կարծում է «Բաց դռներ» հասարակական կազմակերպության նախագահ Միշել Վերտոնը։

Հյուսիսային Կորեան շարունակում է զբաղեցնել առաջին տեղն այն երկրների ցանկում, որտեղ ոնահարվում և խախտվում են քրիստոնյաների իրավունքները։  «Բաց դռներն» իր զեկույցում նշում է, որ «տասնյակ հազարավոր քրիստոնյաներ բանտարկված են հարկադիր աշխատանքի ճամբարներում»։ Կազմակերպությունը նաև նշում է, որ Հնդկաստանում և Չինաստանում իրավիճակը զգալի վատթարացել է, որտեղ ավետարանականների թվաքանակի զգալի աճ է նկատվում։ Հնդկաստանում քրիստոնյաները հինդու ծայրահեղականների զոհ են դառնում։

Իր հերթին Չինաստանում, որտեղ կա մոտ 100 միլիոն ավետարանական քրիստոնյա, հավատացյալների նկատմամբ ճնշումները գործադրում են քաղաքական իշխանությունները։  «Բաց դռներ» հասարակական կազմակերպությունը դատապարտում է 2018թ.-ի հունվարին Չինաստանի Լինֆեն քաղաքում եկեղեցու պայթյունը։ Կազմակերպությունը նաև ցավում է Չինաստանի օրենսդրության խստացման համար, որն արգելում է 18 տարին չլրացած երիտասարդներին  գնալ եկեղեցի կամ էլ ստանալ կրոնական կրթություն։

Այս տարի կազմակերպությունը ցանկանալով ուշադրությունը կենտրոնացնել Ալժիրի իրավիճակի վրա, հրավիրում է Ալժիրի Բողոքական եկեղեցու փոխնախագահ բողոքական հոգևորական Յուսեֆ Ուրհամանին։ Նրա եկեղեցին միավորում է կրոնական պաշտամունքի մոտավորապես 40 վայր՝ հիմնականում Քաբիլիայում։ «Իշխանությունները վախենում են երկրում քրիստոնեության աճից», — ասում է պաստորը։ Քաբիլիայում բողոքների ալիքը սկսվել է մոտ 30 տարի առաջ։ «Բաց դռներ» ՀԿ-ի տվյալներով Ալժիրում ապրում է 68 հազար քրիստոնյա։ «2017թ.-ից մեր վիճակը վատթարացել է», — ասում է Յուսեֆ Ուրհամանը։

Բողոքական հոգևորականը դատապարտում է պաշտամունքի վայրերի փակումը և սանիտարական ստուգումների պատրվակով դրանց փակման սպառնալիքը։ «Օրանում հարկավոր է ամերիկյան իշխանությունների միջամտությունը 2017թ.-ին փակված երեք եկեղեցիների բացմանը հասնելու համար», — պատմում է պաստորը։ 2006թ.-ին Ալժիրը խստացրել է իր օրենսդրությունը գործնականում արգելելով մուսուլմանների դավանափոխությունը։ Ալժիրի Բողոքական եկեղեցու փոխնախագահի խոսքերով ալժիրյան իշխանությունները հրաժարվում են վիզա տալ օտարերկրացի քարոզիչներին և կտրուկ սահմանափակում են Աստվածաշնչի ներկրումը։ 

Հոդվածի բնօրինակը Liberation պարբերականում։