ՆԱՏՕ-ն պետք է պատրաստ լինի Ռուսաստանի ներխուժմանը

Ռուսաստանը բավականաչափ ուժ ունի ԱՄՆ-ի և ՆԱՏՕ-ի տեղակայված զորքերն արագորեն ջախջախելու ու եվրոպական որոշ երկրների տարածքներ գրավելու համար նախքան  հավելյալ օժանդակ ուժերի ժամանելը։ Հետևաբար, դաշնակիցներին հարկավոր է պատրաստվել ռուսական հարձակումն արագորեն ետ մղելու համար։

ՆԱՏՕ-ի զորքերի նախկին հրամանատար, գեներալ Ֆիլիպ Բրեդլավի և դաշինքի Գլխավոր քարտուղարի նախկին տեղակալ Ալեքսանդր Վերշբովի՝ Ատլանտյան Խորհրդի  համար պատրաստված զեկույցի համաձայն՝ Ռուսաստանին զսպելու և դաշինքի ուժերն ամրապնդելու համար անհրաժեշտ է հանգամանորեն դասավորել Լեհաստանի և տարածաշրջանի մշտական և ռոտացիոն զորքերի կազմը։

Զինվորականների կարծիքով, Վլադիմիր Պուտինը ցանկանում է վերացնել Սառը պատերազմի հետևանքները և Երկրորդ աշխարհամարտից հետո Եվրոպայի անվտանգության երաշխիք հանդիսացած կարգի կանոնների հիմքը։ Բրեդլավն ու Վերշբովը նշում են, թե ինչպես էր Մոսկվան օկուպացնում Ուկրաինայի և Վրաստանի տարածքների որոշ մասեր, ուժեղացնում արևմտյան ռազմական շրջանը և Կալինինգրադը, ինչպես նաև  Արևմուտքի դեմ վարում հիբրիդային պատերազմ անկայունություն սերմանելու նպատակով։

Պենտագոնը նույնպես վերադասավորվում է «մեծ պետություններին» դիմակայելու համար՝ ուղղելով իր ուժերն Ռուսաստանի կամ Չինաստանի հետ հնարավոր հակամարտությանը դիմակայելու համար։ Զեկույցի հեղինակներն ընդունում են, որ 2014թ.-ից ԱՄՆ-ն և ՆԱՏՕ-ն որոշակի քայլեր են ձեռնակել ռուսական սադրանքներին դիմակայելու համար։ Ամերիկան Եվրոպա ուղարկեց զրահատանկային բրիգադ, որը ռոտացիայի է ենթարկվում 9 ամիսը մեկ, ինչպես նաև երկրորդ բրիգադի համար մայրցամաքում զենք տեղադրեց, որը ճգնաժամի առաջացման դեպքում կժամանի օգնության։

ՆԱՏՕ-ն Բալթյան երկրներից և Լեհաստանից 1200 զինվորից կազմված 4 բազմազգ ռազմական խմբեր է արդեն տեղակայել։ Դա «զսպում փշալարով» մարտավարությունն է, որն ընդունվել է 2016թ.-ին Վարշավայում կայացած Վարշավյան դաշինքի գագաթաժողովում։ Այն նպատակ ունի ցույց տալ Ռուսաստանին, որ ագրեսիայի դեպքում կհանդիպի դաշնակիցների դիմադրությանը։ Բայց Բրիդլավն ու Վարշբովը նկատում են, որ ԱՄՆ մարտական խմբերն ու զրահատանկային բրիգաները չունեն մարտական գործողությունների համապարփակ և համակարգված պլան, ինչպես նաև հետախուզության, դիտարկումների, հակաօդային և հակահրթիռային պաշտպանության, հեռավոր շառավղով հրետանային համակարգերի միջոցներ, ինչը վերջիններիս խոցելի է դարձնում։

Զեկույցում ասվում է, որ Ռուսաստանի սովորական միջոցներով վճռական հարձակումը, հատկապես արված առանց նախազգուշացման, կարող է հանգեցնել ՆԱՏՕ-ի և ԱՄՆ-ի ուժերի պարտությանը համեմատաբար կարճ ժամանակում և ավելի վաղ, նախքան կժամանեն օգնական ուժերը։ «Մտահոգություններ կան, որ ռուսական օկուպացիան կարող է ավելի շուտ բաժանել դաշնակիցներին և կաթվածահար անել որոշումների կայացման գործընթացը նույնիսկ նախքան կուղարկվեն օգնական ուժերը,- նշում են հեղինակները։

Բրիդլավն ու Վարշբովը խորհուրդ են տալիս, նախևառաջ, մեծացնել ԱՄՆ-ի ներկայությունը Լեհաստանում, որը վճռական դեր է խաղում ՆԱՏՕ-ի՝ Բալթյան երկրները պաշտպանելու ծրագրերում։ Ավելին, նրանք գտնում են, որ որոշ ամերիկյան ուժեր պետք է մնան լեհական տարածքում մշտական հիմունքներով։

Հրապարակման բնօրինակը Military Times պարբերականում։