Այս անգամ ՀՀԿ-ի հենարանը կառավարությունն է

Սահմանադրական փոփոխությունները վկայում են, որ հաջորդ տարի կայանալիք խորհրդարանական ընտրությունները բախտորոշիչ են լինելու Հայաստանի և հայ հասարակության համար:

Միևնույն ժամանակ այս օրերին տեղի ունեցող քաղաքական գործընթացները վկայում են, որ ՀՀԿ-ն, որ այդ ընտրություններում մեծամասնություն ունենալու բնական ձգտում ունի, փոխելու է քարոզչության հիմնական բովանդակությունը` քաղաքականից դեպի տնտեսական և առհասարակ՝ սոցիալական: Դա նշանակում է, որ ՀՀԿ-ն այս անգամ ԱԺ-ում որոշիչ կերպով ներկայանանալու համար որպես հիմնական հենարան է ընտրել Հայաստանի կառավարությունը, որը մինչև ընտրություններ պետք է որոշակի բարեփոխումներ իրականացնի, ինչպես նաև անպայման խոսի և խոստանա էլ ավելի մեծ բարեփոխումներ, եթե խորհրդարանական ընտրություններում Հանրապետական կուսակցությունն ունենա մեծամասնություն:

Սա, ըստ էության, քաղաքական տեխնոլոգիա է, որից զուրկ են բազմաթիվ կուսակցություններ, որոնք այսօր կառավարությունում չունեն նախարարական պորտֆել: Միևնույն ժամանակ, որքան էլ այս հնարքը առաջին հայացքից տհաճ թվա, պետք է փաստել, որ բավականին մեծ դրական տեղաշարժ կլինի, եթե կուսակցություններն իրենց գործունեության և քաղաքականության հիմնական հենարան և թիրախ դարձնեն սոցիալ-տնտեսական շոշափելի գործընթացները, արդարադատությունը, անվտանգությունը և բնակչության բարեկեցությունը: Որովհետև դատարկ քաղաքականության, ինտրիգների, պետություն և ընդդիմություն խաղալու, ինչպես նաև սոցիալական ոլորտի նկատմամբ անլուրջ ուշադրության կամ լուրջ անուշադրության արդյունքում է, որ երկիրը հայտնվել է այս ողորմելի վիճակում: