Կառավարությունը շատ ժամանակ չունի

Թվում է, թե կառավարությունն ուշանալու տեղ չունի և հանգիստ կարող է զբաղվել տնտեսություն զարգացնելով և մեր բարեկեցիկ կյանքն ապահովելով: Բայց իրականում այսպես ասած «վերջնաժամկետ» կա, որը հաջորդ տարվա խորհրդարանական ընտրություններ են: Ի թիվս այլ հանգամանքների, կառավարության փոփոխությունը պայմանավորված էր նաև գալիք համապետական երկու ընտրություններով, որոնցից առաջինը՝ ԱԺ ընտրությունները, արդեն ավելի մեծ նշանակություն ունի, քան նախագահականը: Եվ կառավարության գործունեությունը, այս իմաստով, մի գուցե կոչված է լուծելու հետևյալ երկու խնդիրները.

Ա. Լեգիտիմացնել գործող նախագահ Ս.Սարգսյանին, քանի որ կառավարության հաջողություններն անպայմանորեն կապվելու են նրա անձի հետ;

Բ. Բարձրացնել Հանրապետական կուսակցության վարկանիշը, քանի որ կառավարության հաջողություններն անպայմանորեն «սեփականաշնորհվելու» են այդ կուսակցության կողմից:

Այսպես է իրականում, թե ոչ, հնարավոր կլինի պարզել արդեն մոտ ապագայում. եթե իշխող կուսակցության ներկայացուցիչները սկսեն իրենց վերագրել նոր կառավարության հաջողությունները, կամ խոսեն նրա մասին, որ նոր կառավարությունը գործում է Հանրապետական կուսակցության քաղաքական հովանու ներքո, ապա նշված սցենարը կդառնա իրական: