Արդյունավետ կառավարումը ենթադրում է, նախևառաջ, ծախսերի օպտիմալ կառավարում, ինչը մեր պարագայում, առաջին հերթին, նշանակում է ծախսերի կրճատում: Թիրախում հայտնվելու են, ըստ էության, պետական ապարատը և բյուջեից ֆինանսավորվող տարբեր ՊՈԱԿ-ները, հիմնադրամները և այլ կառույցները:
Այստեղ երկու խնդիր է առաջանում: Առաջինը վերաբերում է նրան, թե որքանով է նպատակահարմար այս փուլում կրճատել բավականին մեծ թվով աշխատողների՝ առանց նախապես ստեղծելու նրանց համար այլ ոլորտներում կամ ձեռնարկություններում աշխատելու հնարավորություն: Երկրորդ հարցն այն է, որ կառավարության ծախսերը և պետբյուջեից ֆինանսավորվող կազմակերպություններում աշխատող անձնանց կրճատելու հաշվին, անշուշտ, բավականին մեծ գումար հնարավոր կլինի խնայել և պահել բյուջեում, բայց խնդիրն այն է, թե ի՞նչ է արվելու այդ խնայված գումարը հետագայում. ուղղվելու է աշխատատեղ ստեղծելուն, ռազմական ծախսերին, թե՞, օրինակ, պետական պարտքի մարմանը:
Այս հարցերին նոր կառավարությունը դեռևս, կարծես թե, չի անդրադարձել: