1993 թվականի նոյեմբերի 12-ին ՄԱԿ Անվտանգության խորհուրդն իր 3313-րդ նիստում ընդունեց թիվ 884 բանաձևը, որով հակամարտության կողմերին կոչ էր անում կատարել նախորդիվ ընդունված 822-րդ, 853-րդ և 874-րդ բանաձևերի պահանջները, և կոչ էր անում Հայաստանին գործածել Լեռնային Ղարաբաղի հայերի վրա ունեցած իր ազդեցությունը:
ՄԱԿ Անվտանգության խորհրդի 884 (1993) բանաձև
14-ը հոկտեմբերի, 1993 թվական
Անվտանգության խորհուրդը,
Վերահաստատելով իր 1993 թվականի ապրիլի 30-ի 822 (1993), 1993 թվականի հուլիսի 29-ի 853 (1993) և 1993 թվականի հոկտեմբերի 14-ի 874 (1993) բանաձևերը,
Վերահաստատելով իր լիակատար աջակցությունը Եվրոպայում անվտանգության և համագործակցության խորհրդակցության (ԵԱՀԽ) շրջանակներում իրականացվող խաղաղ գործընթացին և ԵԱՀԽ Մինսկի խմբի անխոնջ ջանքերին,
Նկատի ունենալով Մինսկի կոնֆերանսի գործող նախագահողի Լեռնային Ղարաբաղի վերաբերյալ Անվտանգության խորհրդի նախագահին 1993 թվականի նոյեմբերի 9-ին ուղղված նամակն ու դրա լրացումները (հավելված S/26718),
Արտահայտելով իր խորը մտահոգությունն այն առթիվ, որ Ադրբեջանական Հանրապետության Լեռնային Ղարաբաղի տարածաշրջանում և դրա շուրջ հակամարտության շարունակությունը և Հայաստանի Հանրապետության ու Ադրբեջանական Հանրապետության միջև հարաբերություններում լարվածության պահպանումը կարող է սպառնալիք դառնալ տարածաշրջանում խաղաղությանն ու անվտանգությանը,
Տագնապով նշելով հրադադարի խախտման և այդ խախտումներին ի պատասխան ուժի անհամաչափ կիրառման արդյունքում ռազմական գործողությունների էսկալացիան, մասնավորապես Ադրբեջանի Զանգելանի շրջանի ու Հորադիզ քաղաքի բռնազավթումը,
Վերահաստատելով Ադրբեջանի և տարածաշրջանի մյուս բոլոր երկրների ինքնիշխանությունն ու տարածքային ամբողջականությունը,
Վերահաստատելով նաև միջազգային սահմանների անխախտելիությունն ու տարածքներ ձեռք բերելու նպատակով ուժի կիրառման անթույլատրելիությունը,
Արտահայտելով խորը մտահոգություն մեծ թվով քաղաքացիական անձանց տեղահանման ամենավերջին դեպքի և Ադրբեջանի հարավային սահմանի մոտ Զանգելանի շրջանում ու Հորադիզ քաղաքում արտակարգ հումանիտար իրավիճակի առիթով,
- Դատապարտում է կողմերի միջև հաստատված հրադադարի վերջին խախտումները, որոնք հանգեցրել են ռազմական գործողությունների վերսկսման, մասնավորապես դատապարտում է Զանգելանի շրջանի ու Հորադիզի բռնազավթումը, խաղաղ բնակիչների վրա հարձակումները և Ադրբեջանական Հանրապետության տարածքը կրակի տակ պահելը,
- Կոչ է անում Հայաստանի կառավարությանը՝ Ադրբեջանի Լեռնային Ղարաբաղի տարածաշրջանի հայերի կողմից 822(1993), 853 (1993) և 874(1993) բանաձևերի պահանջները կատարելու նպատակով գործածել իր ազդեցությունը և ապահովել, որ իրենց զինված արշավը շարունակելու համար ներգրավված ուժերին չտրամադրվեն միջոցներ,
- Ողջունում է ԵԱՀԽ Մինսկի կոնֆերանսի ինն անդամների 1993 թվականի նոյեմբերի 4-ին արված հայտարարությունը և բարձր է գնահատում հրադադարի մասին միակողմանի հայտարարությունների վերաբերյալ դրանում առկա առաջարկությունը,
- Պահանջում է շահագրգիռ կողմերից՝ անհապաղ դադարեցնել ռազմական գործողություններն ու թշնամական ակտերը, միակողմանիորեն դուրս բերել օկուպացիոն ուժերը Զանգելանի շրջանից ու Հորադիզ քաղաքից, ինչպես նաև Ադրբեջանի այլ բռնազավթված շրջաններից՝ 1993 թվականի նոյեմբերի 2-8-ը Վիեննայում կայացած Մինսկի խմբի խորհրդակցության ընթացքում կատարված լրացումներով «Անվտանգության խորհրդի 822 (1993) և 853 (1993) բանաձևերի կատարման անհետաձգելի միջոցառումների նորացված ժամանակացույցի» համաձայն,
- Վճռականորեն կոչ է անում շահագրգիռ կողմերին անհապաղ կերպով վերականգնել Մինսկի խմբին ի աջակցություն Ռուսաստանի Դաշնության կառավարության աջակցությամբ ուղիղ շփումների արդյունքում հաստատված հրադադարի ռեժիմը, և այն դարձնել արդյունավետ ու մշտական, և Մինսկի գործընթացի ու 1993 թվականի նոյեմբերի 2-8-ը Վիեննայում կայացած Մինսկի խմբի խորհրդակցության ընթացքում կատարված լրացումներով «Նորացված ժամանակացույցի» շրջանակներում շարունակել հակամարտությունը բանակցությունների միջոցով լուծելու հնարավորությունների որոնումը,
- Վերստին կոչ է անում տարածաշրջանի բոլոր երկրներին՝ ձեռնպահ մնալ ամեն տեսակ թշնամական ակտերից ու ամեն տեսակ միջամտությունից, որոնք կարող են բերել հակամարտության սրացմանն ու կխաթարեն տարածաշրջանում խաղաղությունն ու անվտանգությունը,
- Խնդրում է Գլխավոր քարտուղարին ու համապատասխան միջազգային կառույցներին՝ անհապաղ հումանիտար օգնություն ցուցաբերել, այդ թվում՝ Զանգելանի շրջանի ու Հորադիզ քաղաքի և Ադրբեջանի հարավային սահմանների տուժած քաղաքացիական բնակչությանը, և օգնել փախստականներին ու տեղահանված անձանց՝ արժանապատիվ կերպով ու առանց վտանգի ենթարկվելու վերադառնալ իրենց տները,
- Վերահաստատում է իր խնդրանքը Գլխավոր քարտուղարին, ԵԱՀԽ Գործող նախագահողին և ԵԱՀԽ Մինսկի կոնֆերանսի նախագահին՝ այսուհետ ևս Խորհդրին շարունակել տեղեկացնել Մինսկի գործընթացի և տեղում իրավիճակի տարբեր ասպեկտների, մասնավորապես իր համապատասխան բանաձևերի կատարման ընթացքի, ինչպես նաև ներկայումս և հետագայում ԵԱՀԽ և ՄԱԿ միջև այս հարցի շուրջ համագործակցության մասին,
- Որոշում է շարունակել ակտիվ զբաղվել այս խնդրով: