Հակամարտությունների հարցով Մինսկի կոնֆերանսում ԵԱՀԿ-ի Գործող նախագահի անձնական ներկայացուցչի պաշտոնը հաստատվել է 1995 թվականի օգոստոսի 10-ին: Այդ պաշտոնում 1997-ի հունվարին նշանակվել է լեհ դիվանագետ, դեսպան Անջեյ Կասպրչիկը:
ԵԱՀԿ-ի Գործող նախագահի անձնական ներկայացուցչի նստավայրը Վրաստանի մայրաքաղաք Թբիլիսին է: Նա ներկայացնում է ԵԱՀԿ-ի գործող նախագահին Լեռնային Ղարաբաղի հակամարտության և դրա հետ կապված հարցերով, օժանդակում է նրան զինված հակամարտության դադարեցմանն ուղղված համաձայնության ձեռքբերման խնդրում, ինչպես նաև աշխատում է ԵԱՀԿ-ի խաղաղարար գործողությունների իրականացման համար անհրաժեշտ պայմանների ապահովման ուղղությամբ:
ԵԱՀԿ–ի Գործող նախագահի անձնական ներկայացուցչի մանդատը.
Ներկայացնել ԵԱՀԿ Գործող նախագահին Լեռնային Ղարաբաղի հակամարտությանն առնչվող հարցերում, աջակցել ԳՆ-ին զինված հակամարտության դադարեցմանն ուղղված համաձայնության ձեռքբերման և ԵԱՀԿ-ի խաղաղարար գործողությունների իրականացման համար անհրաժեշտ պայմաններ ապահովելու հարցերում, որպեսզի հակամարտության համապարփակ քաղաքական կարգավորումն իր բոլոր ասպեկտներով դյուրին դառնա,
- Իր գործուներության մասին հաշվետվություն ներկայացնել ԵԱՀԿ ԳՆ-ին, նրա անունից հանդես գալ Մինսկի կոնֆերանսի համանախագահությունում, անհրաժեշտության դեպքում՝ նաև Մինսկի խմբում, ինչպես նաև ցուցումներ ստանալ ԵԱՀԿ ԳՆ-ի կողմից,
- Ըստ անհրաժեշտության` աջակցել համանախագահությանը,
- Աջակցել բարձր մակարդակով պլանավորման խմբի աշխատանքներին ԵԱՀԿ-ի խաղաղապահ գործողության կազմակերպման հարցերում`համաձայն Բուդապեշտի գագաթաժողովի որոշումների,
- Աջակցել կողմերի միջև վստահության մթնոլորտի, հումանիտար և այլ չափանիշների ձևավորմանն ու զարգացմանը, որոնք կնպաստեն խաղաղ գործընթացին, մասնավորապես՝ անմիջական շփումներին նպաստելու ճանապարհով,
- Նպատակահարմարության դեպքում համագործակցել հակամարտության գոտում ՄԱԿ-ի և այլ միջազգային կազմակերպությունների ներկայացուցիչների հետ: