Խորհրդային արտադրանք

Հրեական արմատներով ՌԴ հայտնի հեռուստահաղորդավար և լրագրող Վլադիմիր Պոզները «Познер онлайн» կայքում պատմել է մոտ  25 տարի առաջ Բելառուսի նախագահ Ալեքսանդր Լուկաշենկոյի հետ իր և մի շարք այլ ռուս լրագրողների հանդիպման մասին և նրան անվանել «խորհրդային արտադրանք՝ վատագույն տեսքով»:

«25 տարի առաջ, տարեթիվը հստակ չեմ հիշում, գործարար Բորիս Բերեզովսկին նախագահ Լուկաշենկոյի հետ հանդիպելու համար Մինսկ էր տարել 20 ռուս լրագրողի, նրանց թվում էի նաև ես:

Մեր պատվին ընթրիք էր կազմակերպվել: Սեղանի գլխին նստած էր Լուկաշենկոն: Մի պահ Բերեզովսկին առաջարկեց, որ մենք հերթով կենաց ասենք ի նշան Բելառուսի նախագահի կողմից մեզ տրված լավ ընդունելության: Իմ հիշողությունը չի պահպանել բարձրաձայնված կենացներից և ոչ մեկը, երևի ոչ մի հետաքրքիր բան չէր հնչել: Բայց ես լավ եմ հիշում, թե ինչ ասացի ես, երբ հերթը հասավ ինձ. «Իմ մայրիկն ինձ սովորեցրել է, որ երբ կիսում ես ինչ-որ մեկի հացը, այդ մարդու մասին պետք է կամ լավը խոսես, կամ չասես ոչինչ: Այդ իսկ պատճառով, Ալեքսանդր Գրիգորևիչ, ես ոչինչ չեմ ասի»: Ասացի և նստեցի»,-պատմել է Պոզները:

Լրագրողի խոսքով` այդ ժամանակ Բերեզովսկին նյարդայնացել է, փորձել է հարթել իր խոսքերը, իսկ Լուկաշենկոն ոչինչ չասելով արտահայտիչ նայել է իր վրա:

«Պետք չէր շատ խելացի մարդ լինել, որպեսզի անգամ այդ ժամանակ հասկանայիր, թե ով է Ալեքսանդր Լուկաշենկոն` վատագույն տեսքով խորհրդային արտադրանք, մարդ, որ պատրաստ է իր իշխանությունը պահելու համար ամենածայրահեղ քայլերի դիմել»,-հավելել է Պոզները:

Նրա կարծիքով՝ Բելառուսում վերջին նախագահական ընտրություններից հետո տեղի ունեցող դեպքերը հաստատում են իր խոսքերը:

«Արցունքաբեր գազի, ռետինե փամփուշտների կիրառումը, խաղաղ ցույցերի դուրս եկած մարդկանց ծեծի ենթարկելը, լրագրողների ձերբակալությունը հանգեցնում են մեկ պնդման՝ Լուկաշենկոյի օրոք Բելառուսը վերածվել է ոստիկանական պետության:

Ես որոշակի պատկերացում ունեմ աշխարհաքաղաքականության մասին և հասկանում եմ, որ պարբերաբար ազգային շահից ելնելով՝ ստիպված ես գործ ունենալ առաջնորդների հետ, որոնց ձեռքը սեղմել չարժի: Եվ ես հենց այդպես եմ նայում Ռուսաստանի ու Բելառուսի հարաբերություններին: Սակայն կապված այս բռնության արշավի, Բելառուսի շարքային քաղաքացիների նկատմամբ անամոթ վերաբերմունքի հետ՝ ես ցանկանում եմ հարցնել. ժամանակը չէ՞ արդյոք որոշակի փոփոխություններ մտցնել այդ հարաբերությունների մեջ: Ժամանակը չէ՞ արդյոք ցույց տալ և՛ Լուկաշենկոյին, և՛ միջազգային հանրությանը, որ Ռուսաստանի համար միևնույն չէ, թե ով է իր դաշնակիցը»,-գրել է Պոզները:

Ինչպես ավելի վաղ տեղեկացրել էր Tert.am-ը, Բելառուսի ԿԸՀ-ն հրապարակել է ընտրությունների նախնական արդյունքները. երկրի գործող ղեկավար Ալեքսանդր Լուկաշենկոն հավաքել է ձայների 80,08, իսկ ընդդիմադիր թեկնածու Սվետլանա Տիխանովսկայան՝ 10,09%-ը:

Ընտրություններին հաջորդել են բողոքի ակցիաները: Երեկ Մինսկում ՕՄՕՆ-ի հատուկջոկատայինները սկսել են կրակել մարդկանց ուղղությամբ, որոնք խորհուրդներ էին տալիս ցուցարարներին: Մոտակա բարձրահարկ շենքերի պատուհաններից նայող բնակիչները բղավել են` հուշելով փախչողներին, թե ուր թաքնվեն, ինչին ի պատասխան ուժայինները մի քանի անգամ կրակ են բացել պատշգամբում գտնվողների ուղղությամբ:

Մինչդեռ երկրի նախագահ Ալեքսանդր Լուկաշենկոն հայտարարել է, որ հետընտրական բողոքի ակցիայի մասնակիցները ղեկավարվել են Լեհաստանից, Մեծ Բրիտանիայից և Չեխայից՝ հեռախոսակապի միջոցով:

Լուկաշենկոն նաև հայտարարել է, որ թույլ չի տա երկրում «մայդան» անել, և երկիրը պառակտելու փորձերին ադեկվատ պատասխան կտա:

«Թույլ չենք տա պառակտել երկիրը»,-ասել է նախագահը:

Տեքստը՝ tert.am-ից