Ինչ անենք

Հրանտ Բագրատյանը հակահամաճարակային գործողություններ է առաջարկել։

Մաս 1

Ճիշտն ասած ուզում էի մի քանի երաժշտական համար (սեփական և այլոց ստեղծագործություններ) ձեր դատողությանը ներկայացնել, վիդեոները կան։ Ուզում էի իմանալ ձեր կարծիքն առ այն, թե որոնք մտցնեմ ալբոմի մեջ։ Բայց կորոնավիրուսը շատ արագ առաջադիմում է և վտանգ կա, որ ՀՀ-ում այն կարող համաճարակի վերածվել։ Այս պահին կառավարությունը մինչև վերջ չի կողմնորոշվում, թե ի՞նչ անի։ Այս ստատուսում կխոսենք բանակի և կալանավայրերի մասին։ Չինաստանի, Իրանի և Իտալիայի փորձը ցույց տվեց, որ այս կառույցները շատ խոցելի են։ Հուսով եմ, որ օգտակար բան ասած կլինեմ։
Բանակ։
— Հնարավորինս շատ արձակուրդներ տրամադրել զինծառայողներին։
— Արգելել տեսակցությունները հարազատների ու բարեկամների հետ (եթե վերջիններս պետք է գնան զորամաս)։
— Սահմանափակել շարային վարժությունները, շարային ստուգումները։
— Զորանոց ու ննջարան մտնելուց առաջ դեզինֆեկցիա անել հագուստը,
— Տրամադրել դիմակներ և լվացվելու միջոցներ,
— Երեք օրը մեկ զինվորներին տալ մեկական Արբիդոլի հաբ, ամենօրյա ռեժիմով ստուգել զինվորների ջերմությունը։
— ՀՀ ՊՆ-ին բավարար քանակի կորոնավիրուսային տեստեր տրամադրել։
Կալանավայրեր։
— Ազատ արձակել բոլոր կալանավորներին, բացառությամբ հայրենիքի դավաճանության, սպանության և մի քանի այլ ծանր հոդվածներով (ցանկը՝ արդարադատության նախարարություն)։ Անձնագրեր չեն տրամադրվում և ՀՀ-ից բացակայելը բացառվում է։
— Տարեվերջին նախատեսված ամնիստիան հայտարարել հիմա։
— Կամերաներում 2 հոգուց ավել պետք չէ թողնել։
— Սահմանափակել կալանավորների ամենօրյա զբոսանքները։
— Ազատ արձակել բոլոր այն կալանավորներին, որոնք ՔԿՀ-ում են հայտնվել խափանման միջոցը նախնական կալանք ընտրելու դատարանների որոշման արդյունքում։
— Կալանավայրերում մնացածներին տրամադրել լվացման միջոցներ,դիմակներ, տրամադրել պրոֆիլակտիկ հաբեր, չափել ջերմությունը։
— Ամենօրյա լոգանքի հնարավորություն տալ բոլորին։

Մաս 2

Շարունակենք հակահամաճարակային միջոցառումների մասին գրառումների շարքը։ Մինչ այդ մեկ բացատրություն. երբ խոսում ենք պետական միջոցառումների մասին, ապա պետք է հասկանանք, որ դրանցից արդյունավետ կլինեն միայն նրանք, որոնք ելնում են այն թեզից, որ ՀՀ-ում կորոնավիրուսը համաճարակային բնույթ է կրելու։ Այդպիսին է կառավարման տեսությունը. նկատի ունենալ ամենածանր սցենարը։ Եթե իրականության մեջ այն ավելի թեթև անցնի, ավելի լավ։ Բայց պետությունը պարտավոր է նկատի ունենալ հնարավոր ամենավատ տարբերակը։ Կարծիք ունեմ, որ մեր պետական այրերը դա չեն հասկանում։ Օրինակ, էկոնոմիկայի նախարարը երեկ մի թեթև անկնարկեց, թե տնտեսության մեջ փոքրիկ նահանջ է հնարավոր, ասենք, զբոսաշրջության բնագավառում։ Տո յուրդտ չբլի, կասեր տատս, բա որ ամբողջ տնտեսությունը փլվի? Կամ վարչապետը այսօր, ինչպես ինքն է ասում հեռավոր Սևանից, տեստավորելու է իրեն ու կնոջը։ Սա այն վարչապետն է, որ ունի մի քանի հարյուր տեստ ընդամենը։ Հա օրերս ՀՀ կհասնի Չինաստանի նվիրած ևս 1000 տեստ։ Այս մարդը ոչինչ չի արել տասնյակ հազարավոր տեստեր, հարյուր հազարավոր դիմակներ ունենալու համար։ Հիմա էլ իզուր տեղը վարի է տալիս 2-ը։ Այդ տեստերը հիվանդների համար են և այսօր ոսկու գին ունեն։ Հիմա միջոցառումներից։
Տրանսպորտ։
— Մոբիլիզացնել մի քանի հարյուր բեռնատար մեքենա Վրաստանի և Իրանի հետ պայմանավորված կարգով պարենամթերքի, դեղորայքի, մանկական սննդի ներմուծումներն անխափան իրականացնելու համար (ժամանակին ավելի ծանր բան էլ է եղել. լրիվ շրջափակման պայմաններում ՀՀ-ն ցորենը Աստրախանից բեռնանավով բերում էր իրանական Հենզելի և ապա այն տեղից բեռնատար փոքրիկ Зил-երով տեղափոխում ՀՀ։ Ճանապարհին այդ մեքենաները բաքերով նաև դիզվառելիք էին բերում կռվող բանակի համար)։
— Վրաստանի և Իրանի հետ մաքսակետերում լվանալ և դեզինֆեկցիա անել բոլոր մեքենաները։
— Վարձել 2 Ռուսլան ինքնաթիռ ավիանավթի անխափան մատակարարումների համար։
— Առայժմ պահել հետևյալ օդային ուղղությունները. Վրաստան, ՌԴ, Ուկրաինա, Լեհաստան, Հունաստան, Գերմանիա, Չեխիա, ԱՄԷ, Եգիպտոս, Ղազախստան, Բելառուս։ Մնացածը փակում ենք։
— Կարանտինային ծառայություններ կազմակերպել դեպի Արցախ 2 ճանապարհների վրա (լվանալ և դեզինֆեկցիա անել բոլոր մեքենաները)։ Չի կարելի վիրուսը ներս բերել Արցախ։
— Պետական ռեզերվում ապահովել ալյուրի, նպարեղենի, կաթի փոշու, մսի, շաքարի և այլն 2-3 ամսվա պաշար։
— Երևան, Գյումրի, Վանաձոր, Աբովյան, Հրազդան, Արմավիր, Էջմիածին, Արտաշատ, Արարատ, Իջևան, Դիլիջան, Վայք, Սիսիան, Գորիս, Ղափան, Մեղրի, Սևան, Գավառ և այլն քաղաքներում քաղաքային տրանսպորտի, տաքսի ծառայությունների աշխատանքը կազմակերպել դիմակներով (նկատի ունենք վարորդներին և ուղևորներին)։ Արգելել մուտքն առանց դիմակների։
— Արգելել առանց դիմակների մարդկանց երթևեկությունը Երևանի մետրոյով և երկաթգծով։
Առևտուր և ծառայություններ։
— Արգելել առանց դիմակների սրճարաններ և ռեստորաններ այցելելը, սպասարկումը։
— Անցնել մեկանգամյա թղթե ափսեների, բաժակների, գդալների և այլն օգտագործմանը։
— օրեկան մի քանի անգամ դեզինֆեկցիա անել խանութները, սրճարաններն ու ռեստորանները, ծառայությունների մյուս օբյեկտները։
— կազմակերպել on-line գնումներ, սոցիալական ծառայությունների միջոցով դրանք հասցնել թոշակառուներին, ծերերին, միայնակներին։
— Խանութներում ոչ-ոք առանց դիմակի և ձեռնոցների չպետք է լինի։
— Քաղաքապետարանը պետք է օրը 2 անգամ լվանա բոլոր բազմաբնակարանային շենքերի շքամուտքերը, լիֆտերը, աստիճանավանդակները։
— Ամեն օր լվանալ Երևանի, Գյումրվա և Վանաձորի կենտրոնական փողոցները։
— Անհրաժեշտության դեպքում մի քանի հարյուր հազար դիմակ կարելու պատվեր իջեցնել տեղական արտադրողներին։
Շարունակելի

Մաս 3

Սիրելիներս։ Շնորհակալություն քննարկումներին ակտիվոր են մասնակցելու համար։ Դժբախտաբար այս պահի դրությամբ ունենք 26 վարակակիր։ Եվս 300 հոգու ստուգում ենք։ ԱՊՀ տարածքում այս պահին բնակչության 100 հազ մարդու հաշվով վարակակիրների թվով “1-ին” տեղում ենք։ Թվերն (ըստ ԱՀԿ կայքի) այսպիսին են. ՀՀ — 1, Մոլդովա — 0.45, Բելառուս — 0.27, Ադրբեջան՝ 0.15, ՌԴ — 0.04, Ղազախստան — 0.03, Ուկրաինա՝ 0.008, Ղրղզստան — 0, Տաջիկստան — 0, Ուզբեկստան — 0, Թուրքմենստան — 0։ Սա, ի դեպ, ՀՀ կառավարության գործունեության գնահատականն է։ Չ՞է որ 2 ամիս ժամանակ կար նախապատրաստվելու։
Հիմա մեր մյուս առաջարկությունների մասին։

Ֆինանսներ, բանկեր, բյուջե, ձեռնարկատիրություն։
— Կառավարությունը պետք է հայտարարի, որ եթե կորոնավիրուսով պայմանավորված տնտեսական դժվարություննները շարունակվեն 3 ամիս և ավել, ապա ձեռներեցների (բոլորի) չստացված եկամուտների կեսը կփոխհատուցվի պետական ներքին պարտքի պարտատոմսերով, որոնցով կարելի կլինի փակել հիմնարկ ձեռնարկություննների հարկային պարտավորությունները։ Ընդ որում կլինի հատուկ հանձնաժողով, որը հատ հատ կնայի բոլոր դիմումները։
— Նպատակահարմար չեմ համարում լրացուցիչ հարկային արտոնություններ տրամադրելը։ Կիսում ենք ձեռնարկատիրական ռիսկը և վերջ։
— Հնարավորության սահմաններում կառավարությունը պետական ռեզերվներում առկա պահուստներից սննդամթերքի, վառելիքի և դեղորայքի հումք պետք է մատչելի գներով տրամադրի տնտեսավարող սուբյեկտներին։
— Կառավարություն և ԿԲ-ը հայտարարում են, որ կարճաժամկետ (մինչև 6 ամիս) հատվածում դրամի փոխանակարժեքի տատանումները չեն գերազանցի 7%-ը։
— Նպատակահարմար է առաջիկա 6 ամիսների համար պետության կողմից վերաապահովագրել բոլոր ավանդները։
— Առաջիկա 6 ամիսների համար պետք է չեղարկել հաստիքային կրճատումներն ու աշխատանքից մարդկանց ազատելը, մորատորիա մտցնել այլ գործատուների նմանատիպ գործողությունների նկատմամբ։
— Դադարեցնել պետության կողմից վճարումները կուտակային կենսաթոշակային համակարգերին։
— Կատարել օրենքի փոփոխություն և 6 ամիս ժամանակով գործավորների կողմից կենսաթոշակային կուտակային կատարվող վճարումները դարձնել կամավոր։
— ՀՀ պետական և համայնքների բյուջեներից դադարեցնել կապիտալ վերանորոգման և ներդրումների այլ ուղղություններով ծախսերի ֆինանսավորումը։
— Դադարեցնել բոլոր տեսակի վիճակախաղերի, լոտոների, Տոտոների, Վիվարոների, Աջարապետների գործունեությունը 6 ամսով։

Կրթություն։
— Կրթական հաստատությունների գործունեության հետաձգումը ճիշտ է։ Բայց ավելի ճիշտ է, մասնավորապես, ԲՈՒՀ-երը դիստանցիոն կառավարման անցկացնելը։ Առանց այդ էլ այս հարցում մենք հետամնաց ենք։ Մինչդեռ ունենք տարածաշրջանում ինտերնետն ամենաշատն օգտագործող հանրություն։
— Հայտարարել, որ այս տարվա ընդունելության քննությունները հետաձգվնում են և դադարեցնել ռեպետիտորական պարապմունքները։
— Բժշկական ինստիտուտը և ուսումնարանները պետք է շտապ ետ կանչել արձակուրդից։ Ուսանողները, գործող բժշկական անձնակազմը պետք է ամենօրյա դասախոսություններ լսեն վիրուսաբանության, իմունոբանության (իմ տեղեկություններով, ցավոք սրտի բժշկականում այս ստորաբաժանումը փակվել է), վարակի դեմ պայքարելու պրոֆիլակտիկայի, հիվանդների վերականգման և այլն թեմաներով։
— Այսօրվանից հանրապետության մեծ հիվանդանոցներից մեկը (դա կարող է լինել հանրապետականը կամ Նորքը) դատարկել և վերակառուցել կորոնավիրուսով հիվանդների համար։
Շարունակելի