Տաթև Վարդանյանի դիտարկումները ԵԱՀԿ ՄԽ համանախագահների՝ Թուրքիայի արտգործնախարարի հետ ունեցած հանդիպման և դրան հետևած քննարկումների շուրջ
Դավադրությունների տեսություն չկա, կոնկրետ դավադրություն կա
Պետք է որ հիշեք` 1921-ին Մոսկվայի քեմալ-բոլշևիկյան բանակցությունների ընթացքում, երբ գլոբալ առումով որոշվում էր Հարավային Կովկասի պետականակերպ սուբյեկտների սահմանների ճակատագիրը, մեզ վերաբերվող հարցերը լուծվեցին առանց մեր մասնակցության: Խնդրին քաջածանոթ մարդիկ գիտեն, թե ինչպես եղավ, որ հայկական պատվիրակությանը թույլ չտրվեց մասնակցել բանակցություններին և ընդհանրապես` ինչպես մեզ վերաբերվող հարցերի շուրջ որոշումներ կայացվեցին առանց մեր մասնակցության:
Շուրջ 100 տարի անց նույն իրավիճակում ենք. Թուրքիան և ԵԱՀԿ Մինսկի խումբը մեզ վերաբերվող հարցերի շուրջ բանակցում են` առանց մեզ: Խնդրո առնչությամբ ՀՀ ԱԳ նախարարը թվիթերում աղոթում է, իսկ ՌԴ ԱԳՆ մամլո խոսնակը ՀՀ ԱԳՆ մամլո խոսնակի հոգին է կանչում ֆեյսբուքյան քննարկումներում` բացահայտ ծաղրուծանակի առարկա դարձնելով Նիկոլ Փաշինյանի օրոք հայկական դիվանագիտություն ասվածը: Սա դավադրությունների տեսություն չէ, սա հայ ժողովրդի թիկունքում հյուսված դավադրությունն է` Հայաստանում իշխանությունը զավթած անգրագետ պողոսների վարչապետի և օտարերկրյա գործակալական ցանցի ուղիղ մասնակցությամբ:
Ինչպես 100 տարի առաջ հայկական հարցը դարձրեցին ֆուտբոլի գնդակ ու մեր հաշվին հարցեր լուծեցին, նույն կերպ էլ հիմա են վարվում, որովհետև պատմությունից դասեր քաղել, ավաղ, մենք չսովորեցինք: Որովհետև ազգովի` ով գոռաց խիյար, աղն առանք ու հետևից վազեցինք, գոնե մեկ անգամ խիյարը կծելու հույսով: Բայց, եթե պողոսների վարչապետին ու օտարեկրյա գործակալներով վխտացող նրա շրջապատին թվում է, թե միջազգային երաշխիքներով իշխանություն են պահելու, իսկ չպահելու դեպքում երաշխավորված անվտանգ ապագա են ունենալու արտասահմաններում ու դրա դիմաց ապահովելու են օտարեկրյա գործակալան ցանցի մասը կազմող հայ աղանդավորների ու ադրբեջանցիների համատեղ բնակեցումը Արցախի հարավում` Արաքսի ափերին, ապա չարաչար սխալվում են: Թուրքն Արցախ չի մտնելու: Գոնե «Նեմեսիս» գործողության պատմությունը կարդացեք…