Մինսկի խումբն անփոփոխ է

ԵԱՀԿ Մինսկի խմբի համանախագահ երկրների պատվիրակությունների ղեկավարների համատեղ հայտարարություն

2019 թվական, դեկտեմբերի 5, Բրատիսլավա

Բրատիսլավայում ԵԱՀԿ Նախարարական խորհրդի նիստի շրջանակներում մենք՝ ԵԱՀԿ Մինսկի խմբի համանախագահ երկրների պատվիրակությունների ղեկավարներս (Ռուսաստանի Դաշնության արտաքին գործերի նախարար Սերգեյ Լավրովը, Ֆրանսիայի՝ Եվրոպայի և արտաքին գործերի նախարարի պետքարտուղար Ժան-Բատիստ Լեմուանը, ԱՄՆ պետքարտուղարի Եվրոպայի և Եվրասիայի հարցերով օգնական Ֆիլ Ռիքերը) շարունակում են հավատարիմ մնալ Լեռնային Ղարաբաղի հակամարտության խաղաղ կարգավորման հարցում իրենց միջնորդությանը։

Համանախագահ երկրների պատվիրակությունների ղեկավարները դրական են գնահատում շփման գծում և միջազգային սահմանին բռնության հարաբերական ցածր մակարդակը և շնորհակալ են կողմերին՝ լարվածության սրման վտանգը նվազեցնելու նպատակով անմիջական կապը լիակատար օգտագործելու համար, ինչպես արտգործնախարարներն էին պայմանավորվել հունիսին՝ Վաշինգտոնում կայացած խորհրդակցությունների ժամանակ: Մենք ողջունում ենք անցյալ տարվա ընթացքում ձեռնարկված հստակ քայլերը, որոնք ուղղված են եղել լարվածության նվազեցմանը և բնակչությանը խաղաղության նախապատրաստելուն, ինչպես կոչ էին արել համանախագահող երկրները 2018-ի դեկտեմբերին Միլանում արված հայտարարությամբ և ինչպես նախարարները պայմանավորվել էին Փարիզում՝ 2019-ի հունվարին: Մենք ողջունում ենք մարդասիրական քայլեր իրականացնելու ջանքերը, որոնք քննարկվել էին ղեկավարների միջև մարտին Վիեննայում կայացած հանդիպման ժամանակ և մշակվել էին ապրիլին Մոսկվայում արտգործնախարարների կողմից, մասնավորապես՝ վերջերս տեղի ունեցած լրագրողների փոխադարձ այցերն ու հունիսի 28-ին բանտարկյալների համաժամանակյա ազատ արձակումը: Ընդգծելով, որ նման ջանքերը կարևոր դեր են խաղում խաղաղ լուծում գտնելուն ուղղված առարկայական բանակցություններին նպաստող մթնոլորտի ստեղծման հարցում՝ երեք պատվիրակությունների ղեկավարները կոչ են անում մարդասիրական և անվտանգության հավելյալ հստակ քայլեր իրականացնել:

Համանախագահ երկրների պատվիրակությունների ղեկավարները վճռականորեն կոչ են անում կողմերին՝ անվերապ կերպով հստակ քայլեր ձեռնարկել ավելի վաղ համաձայնեցված մարդասիրական և անվտանգային միիջոցառումները կյանքի կոչելու ուղղությամբ։ Նկատի ունենալով հարազատներին կորցրած մարդկանց սարսափելի տառապանքները՝ մենք կողմերին կոչ ենք անում կրկնապատկել Կարմիր Խաչի միջազգային կոմիտեին աջակցելու ջանքերը՝ անհետ կորած անձանց մասին տվյալները, ինչի շուրջ երկու երկրների ղեկավարները պայմանավորվել են Փարիզում՝ 2014-ի հոկտեմբերին կայացած գագաթնաժողովում: Գնահատելով Գործող նախագահի անձնական ներկայացուցչի (ԳՆԱՆ) զգալի ավանդը հրադադարի պահպանման հարցում՝ ընդգծում ենք ԳՆԱՆ դիտարկման առաքելությունն ընդլայնման թեմայով քննարկումներն ամփոփելու անհրաժեշտությունը, ինչի շուրջ կողմերը համաձայնություն են ձեռք բերել 2016-ին:  

Մենք ողջունում ենք խաղաղ կարգավորման առանցքային խնդիրների շուրջ բանակցություններն ակտիվացնելու և ամենաբարձր մակարդակով հետագա բանակցություններին օժանդակելու նպատակով 2020-ի սկզբին համանախագահների հովանու ներքո կրկին հանդիպելու Ադրբեջանի և Հայաստանի արտգործնախարարների մտադրությունը։ Համանախագահ երկրների պատվիրակությունների ղեկավարները վերահաստատում են, որ արդար և հարատև կարգավորումը պետք է հիմնված լինի, մասնավորապես, Հելսինկյան եզրափակիչ ակտի ՝ ուժի և ուժի սպառնալիքի չկիրառման, տարածքային ամբողջականության, ու ժողովուրդների իրավահավասարության և ինքնորոշման իրավունքի սկզբունքների վրա,  ինչը վկայակոչված է համանախագահ երկրների պատվիրակությունների ղեկավարների և Ադրբեջանի ու Հայաստանի արտգործախարարների՝ 2009-ին Աթենքում նախարարական խորհրդի նիստի ժամանակ արված համատեղ հայտարարությամբ, և որը հաստատվել է նաև ԵԱՀԿ Նախարարական խորհրդի կողմից։ Այն պետք է ներառի նաև լրացուցիչ տարրեր, որոնք 2009-2012 թթ-ին առաջարկվել են համանախագահող երկրների նախագահների կողմից:

Համանախագահ երկրների պատվիրակությունների ղեկավարները վերստին ընդգծում են, որ ստատուս-քվոն անընդունելի է, և հակամարտությունը չի կարող ռազմական լուծում ունենալ: Ուստի մենք կողմերին կոչ ենք անում առանց ձգձգումների կամ պայմանների բարեխիղճ առարկայական բանակցություններ վարել:

Համանախագահ երկրների պատվիրակությունների ղեկավարները վստահություն են հայտնում, որ կայուն կարգավորման հասնելու ջանքերի համար ԵԱՀԿ Մինսկի խմբի ձևաչափը շարունակում է մնալ անփոխարինելի հիմնակետ: Կոչ ենք անում կողմերին համագործակցել միմյանց և ԵԱՀԿ ՄԽ համանախագահների հետ, որոնց մենք կհրահանգենք շարունակել իրենց միջնորդական ջանքերը։

Հայտարարության բնօրինակը ԵԱՀԿ պաշտոնական կայքում