Արդյո՞ք Զիմբաբվեի նոր նախագահն իրականում փոփոխություն կբերի

CNN հեռուստաալիքն անդրադարձել է Զիմբաբվեի նոր նախագահ Էմերսոն Մնանգագվային, ինչպես նաև մատնանշել այն առաջնահերթությունները, որոնց լուծումը մեծ կարևորություն է ներկայացնում երկրում իրական փոփոխությունների հասնելու ճանապարհին:  Անդրադարձը ներկայացնում ենք ստորև.

«Էմերսոն Մնանգագվան, որը հայտնի է «Կոկորդիլոս» անվամբ, զինվորականների աջակցությամբ երկրի արդեն նախկին նախագահ Ռոբերտ Մուգաբեին ուղարկել է «ուշացած» թոշակի և քաղաքականապես չեզոքացրել` Գրեյսի Մուգաբեին (խմբ.- Զիմբաբվեի նախկին առաջին տիկինը) և նրա դաշնակիցներին:

Զիմբաբվեցիները բոլորը տեղյակ են Մնանգագվայի անցյալից, ինչպես նաև գիտեն, թե նա ինչի է ընդունակ: Նա այն մարդն է, ով գլխավորել է ազգային հետախուզական գործակալությունը, ինչպես նաև երկրի պաշտպանության և արդարադատության նախարարությունները երկրում ճնշման և դաժանության ժամանակներում: Նա արատավորված է 1980-ականներին Մատեբելելանդյան ջարդերին իր մասնակցության վերաբերյալ մեղադրանքներով: Ընդդիմության ներկայացուցիչներն ասում են, որ նա կանգնած է ընտրական բռնությունների, ընտրակեղծիքների և Զիմբաբվեի բնական ռեսուրսների թալանի հետևում:

Տարիներ առաջ, ԱՄՆ պետական քարտուղարությունը պատժամիջոցներ էր կիրառել Մնանգագվայի և մյուսների նկատմամբ ի պատասխան «քաղաքական հակառակորդների նկատմամբ բռնության գործադրման և մարդու այլ իրավունքների ոտնահարումների»: Այս պատժամիջոցները մնում են ուժի մեջ:

Զիմբաբվեցիները գիտեն, որ նա Ռոբերտ Մուգաբեի կատարողն  էր, աջ ձեռքը և դրածոն: Մինչ այժմ՝ այս օրերին, շատերը պատրաստ են անտեսել Մնանգագվայի անցյալը: Նրանք պատրաստ են հնարավորություն տալ նրան: Նրանք հուսով են, որ նա կառաջնորդի իրենց որպես ազգի, այլ ոչ թե որպես իշխող «Զիմբաբվեի աֆրիկյան ազգային միություն-Հայրենասիրական ճակատ» ( «Զանու ՊՖ») կուսակցության ղեկավարի: Շատ զիմբաբվեցիներ ոգևորված են Մուգաբեի մղձավանջային տարիների ավարտի կապակցությամբ: Նրանց նույնիսկ ավելի մեծ ոգևորություն է պատճառել այն հանգամանքը, որ նոր նախագահը նրա կինը՝ Գրեյս Մուգաբեն չէ: Մասնավորապես, Մնանգագվայի նկատմամբ համակրանքը գալիս է նրանից, որ նոր նախագահը ինչ-որ մեկն է, բայց ոչ Գրեյսին:

Նրանք, ովքեր ճանաչում են նրան, ասում են, որ նա կարող է լինել պրագմատիկ ունկնդիր, որ նա գաղափարախոս չէ: Արդյո՞ք նա լսել է բոլոր զիմբաբվեցիներին, ովքեր վերջին մի քանի օրերին դուրս էին եկել փողոցներ: Արդյո՞ք նա լսել է օտարերկրյա ներդրողների հիասթափության մասին: Արդյո՞ք նա կլսի և քվեարկության իրավունք կտա միլիոնավոր զիմբաբվեցիներին, ովքեր գտնվում են Հարավային Աֆրիկայում, Միացյալ Թագավորությունում, Ավստրալիայում և ԱՄՆ-ում:

Նա ցանկանում է տպավորություն գործել, որ ինքը Զիմբաբվեն տանում է նոր ճանապարհով:  Նա պետք է ցույց տա, որ ինքը կգործի այլ կերպ, քան նա (Ռոբերտ Մուգաբեն), որին ինքը հեռացրեց իշխանությունից:

Զիմբաբվեցիները կգովաբանեն նրան, երբ նա խոսի աշխատանքի և խաղաղության մասին, սակայն ակնհայտ  է, որ նոր նախագահն ունի մեծ թվով անելիքներ.

Արդյո՞ք նա կվերացնի լրատվամիջոցների վերաբերյալ «պատժիչ» օրենքները և թույլ կտա լրագրողներին և հրատարակիչներին իրենց աշխատանքն անելու՝ առանց վախենալու, որ կձերբակալվեն: Արդյո՞ք նա իր նախորդի նման կպատժի նրանց, ովքեր վիրավորում են նախագահին: Արդյո՞ք նա կվերացնի հասարակական կարգի վերաբերյալ դրակոնյան օրենքները: Կարո՞ղ է նա երաշխավորել սեփականության իրավունքը: Նա ասում է, որ կարող է:

Ազատ և արդար ընտրությունների անցկացումը չափազանց կարևոր է: Սակայն ընտրողների գրանցման գործընթացը պետք է երկարաձգվի, իսկ ընտրողների ցուցակները՝ թարմացվեն: Միջազգային հանրությունը պետք է թույլտվություն ստանա դիտարկելու ընտրությունների ընթացքը:

Զիմբաբվեցիները գիտեն, որ փոփոխություն է եղել: Այս պահի դրությամբ, փոփոխությունը վերևում է. միայն հեռացվել են Մուգաբեն , նրա կինը և նրանց մտերիմները: Ինչպես ասել է մի մեկնաբան .«Դիկտատորը հեռացել է, բաց դիկտատուրան մնում է»: Այսպիսով, զիմբաբվեցիները այժմ հետևում են «Կոկորդիլոսին» որոշակի կասկածանքով, բայց նաև լավատեսության և անսահման համբերությամբ զգացումով,- ասվում է հոդվածում: