Քառասուն տարի առաջ Իսրայելը և Եգիպտոսը հաշտվեցին

Իսրայելական Israel Hayom պարբերականը անդրադարձել է Եգիպտոսի նախագահ Անվար Սադաթի 1977թ-ի նոյեմբերին  Իսրայել կատարած պատմական այցին, որը նշանավորվեց եգիպտա-իսրայելական հաշտության պայմանագրի կնքմամբ՝ փոխելով Մերձավորարևելյան տարածաշրջանում մինչ այդ տիրող իրավիճակը: Հոդվածը ներկայացնում ենք ստորև.

«Քառասուն տարի առաջ Անվար Սադաթի Իսրայել կատարած այցը և դրան հետևած հաշտության համաձայնությունը անակնկալ և  անկանխատեսելի էր բոլոր  հրեաների համար: Ոչ ոք չէր պատկերացնում նման շրջադարձ 1977թ-ին:

Հանգուցյալ  վարչապետ Իցհակ Ռաբինը սիրում էր կրկնել. «Մեր հետախուզությունը չկարողացավ կանխատեսել ինչպես պատերազմը, այնպես էլ խաղաղությունը»: Եվ նա ճիշտ էր կապված երկու ճակատագրական իրադարձությունների՝ 1973թ-ի պատերազմի և Անվար Սադաթի  հաշտության գործընթացի նախաձեռնման վերաբերյալ:  Սադաթը խաղաղության հասնելու իր ձգտումով  անակնկալի բերեց իսրայելական իշխանություններին: Եգիպտոսի նախագահի եռօրյա այցի ընթացքում Սադաթը և Բեգինը  դրսևորեցին քաղաքական գործչի անգերազանցելի  ունակություններ:  Սադաթը իր ելույթում  խաղաղության հասնելը ներկայացրեց որպես անզիջում դիրքորոշում, իսկ Բեգինը խորությամբ ընկալեց արաբական ամենահզոր երկրի հետ խաղաղության հասնելու  ռազմավարական կարևորությունը:

Իսրայելի քաղաքացիները ցնցված էին տեղի ունեցածից: 1973թ-ին արյունալի պատերազմի նախաձեռնողը, որը խորը սպի էր թողել իսրայելական հասարակության վրա, հանկարծ դարձավ հրեաների սիրելին: Նաև ոչ ոք չէր սպասում, որ հենց Մենահեմ Բեգինը, ում գաղափարական հակառակորդները անվանում էին «պատերազմ սկսող»,  իր ժողովրդին կբերեր ամենաերկար խաղաղությունը:

Երկու երկրների հաշտությունը կարելի էր բնութագրել որպես  «սառը խաղաղություն»:  Եգիպտացիները առաջվա նման ատում են հրեաներին և  Սադաթին դավաճան համարում: Մյուս կողմից  քիչ չեն այն հրեաները ովքեր համոզված են, որ Սինայի թերակղզու ամբողջական հանձնումը Եգիպտոսին  վտանգավոր նախադեպ էր:

Այնուամենայնիվ երկու ազգերի միջև հաստատված «սառը խաղաղությունը» ձևական բնույթ ստացավ և այսօր երկու երկրները համատեղ պայքար են մղում արմատական իսլամի դրսևորումների դեմ: