Ռուսաստանի հետ Թրամփի կապը

The Washington Post պարբերականն անդրադարձել է ԱՄՆ նախագահական ընտրությունների ժամանակ ռուսական ենթադրյալ միջամտությանը: Պարբերականի անդրադարձը ներկայացնում ենք ստորև.

«Անցյալ շաբաթ Դոնալդ Թրամփի նախընտրական շտաբի նախկին ղեկավար Փոլ Մանաֆորտը և նրա բիզնես գործընկեր Ռիկ Գեյթսը տնային կալանքի տակ էին պահվում՝ հատուկ դատախազ Ռոբերտ Մյուլլերի կողմից նրանց մեղադրանք ներկայացնելուց հետո: Կրեմլի հետ կապեր ունեցած շտաբի անդամն այժմ աջակցում է ընտրություններին միջամտության վերաբերյալ Մյուլլերի վարած հետաքննությանը (խմբ.- ԱՄՆ նախագահական ընտրություններին ռուսական միջամտության վերաբերյալ գործ)

Արդարադատության դեպարտամենտը կարող է մեղադրանքներ առաջադրել ռուսական պաշտոնյաների դեմ, որոնք պատասխանատու են Դեմոկրատական կուսակցության ազգային կոմիտեի փաստաթղթերի վրա հաքերային գործողությունների համար: Չնայած ԱՄՆ նախագահ Դոնալդ Թրամփի մեծ ջանքերին, ակնհայտ է, որ Սպիտակ տունը չի կարողանա ազատվել Կրեմլի միջամտության վերաբերյալ ապացույցներից:

Մանաֆորին և Գեյթսին ուղղված մեղադրանքները չեն վերաբերում ընտրություններին միջամտությանը, չնայած նախընտրական շտաբի նախկին ղեկավարը մեղադրվում է 75 միլիոն դոլարի չափով գումարի «լվացման» մեջ, որի մեծ մասը ստացվել է պրո-կրեմլական քաղաքական գործիչներից:

Շատ ավելի արատավոր է Թրամփի նախընտրական շտաբի արտաքին քաղաքականության հարցերով խորհրդական Ջորջ Պապադոպուլոսի հաշվետությունը, ով կարծես թե ամիսներ շարունակ Մյուլլերի թիմին տեղեկատվություն է տրամադրել: Կրեմլի հետ առնչություն ունեցող մի պրոֆեսորի հետ հանդիպումից հետո, Պապադոպուլոսը տեղեկացել էր, որ ռուսներն ունեին  «վարկաբեկող տվյալներ» այն ժամանակ Դեմոկրատական կուսակցությունից նախագահի թեկնածու Հիլարի Քլինթոնի վերաբերյալ:

Նա բազմիցս ձգտել է կապ հաստատել ռուս պաշտոնյաների հետ և հանդիպում կազմակերպել Թրամփի և ՌԴ նախագահ Վլադիմիր Պուտինի միջև: Նրան խրախուսում էր նախընտրական շտաբի մեկ այլ պաշտոնյա՝ Սեմ Կլովիսը, ով այժմ ծառայում է որպես Գյուղատնտեսության դեպարտամենտի Սպիտակ տան ավագ խորհրդական:

2016 թ.-ի ապրիլին պրոֆեսորն ակնարկել էր Քլինթոնի էլեկտրոնային նամակների ապացույցների մասին: Հունիսին Դոնալդ Թրամփ կրտսերը հանդիպում է ունեցել մի ռուս իրավաբանի հետ Քլինթոնի վերաբերյալ «վարկաբեկող տվյալներ» ստանալու ակնկալիքով:

Պապադոպուլոսին երբեք չի հաջողվել կազմակերպել երկու առաջնորդների միջև հանդիպում, իսկ Կրտսեր Թրամփն իր հանդիպումը պիտակավորել է որպես ձախողում: Բայց հուլիսին  WikiLeaks-ը սկսեց հրապարակել Դեմոկրատական կուսակցության ազգային կոմիտեի էլեկտրոնային նամակները, որոնցից Թրամփը մեծ ոգևորությամբ մեջբերումներ էր անում:

The Post’s-ի հաշվարկով, Թրամփի գործընկերներից 9-ն անմիջական կապեր են ունեցել ռուսական պաշտոնյաների հետ նախընտրական քարոզարշավի ժամանակ: Նրանց թվում են արտաքին քաղաքականության գծով նախկին խորհրդական Կարթեր Փեյջը, ով համակարգել է նախընտրական արշավի պաշտոնյաների հետ 2016 թ.-ի հուլիսին Մոսկվա կատարած այցը: Նրանց թվում է նաև գլխավոր դատախազ  Ջեֆ Սեսիոնսը, ով ինչպես հաղորդվում է, մերժել է Պապադոպուլոսի առաջարկը Թրամփ-Պուտին հանդիպման առնչությամբ, բայց նա իր վկայության առնչությամբ կանգնած է նոր քննության առջև հաշվի առնելով նախընտրական շրջանում ռուսական պաշտոնյաների հետ շփումների առումով նրա տեղեկությունները:

Ժամանակին Թրամփը հանդիպում է ունեցել Պապադոպուլոսի և Սեսիոնսի հետ, երբ Պապադոպուլոսը ներկայացրել իր առաջարկը, սակայն հանդիպման առնչությամբ ԱՄՆ նախագահն այժմ նշում է, որ «շատ բան չի հիշում»:

Կասկածից վեր է, որ ռուսական կառավարությունը փորձել է օգնել Թրամփին նախընտրական արշավի ժամանակ և որ նախընտրական շտաբի որոշ պաշտոնյաներ բաց են եղել ՌԴ-ի հետ համագործակցության հարցում:

Սակայն հարցը նրանում է, թե որքան հեռու է գնացել այդ համագործակցությունը և ով գիտեր այդ մասին շտաբում: Օրինակ հետաքրքրական է՝ արդյոք Թրամփի և Սեսիոնսի հետ հանդիպման ժամանակ Պապադոպուլոսը նշել է Քլինթոնի էլեկտրոնային նամակների վերաբերյալ Կրեմլի ապացուցների մասին: ԱՄՆ նախագահի «Գաղտնի համաձայնություն (դավադրություն) չկա» թվիթերյան հայտարարությունը բավարար չէ»,- ասվում է հոդվածում: