Մերկելի կուսակցությունը նվիրատվություններ է ստացել Ադրբեջանից

Deutsche Welle պարբերականն անդրադարձել է Գերմանիայի կանցլեր Անգելա Մերկելի կուսակցության կողմից՝ Ադրբեջանից նվիրատվություններ ստանալուն:

Պարբերականի անդրադարձը ներկայացնում ենք ստորև.

«Անգելա Մերկելի Քրիստոնեա-դեմոկրատական կուսակցության (ՔԴԿ) տարածաշրջանային մասնաճյուղը 28 հազար եվրոյի չափով գումար է ստացել պետական կարգավիճակ ունեցող ադբեջանական նավթագազային Socar ընկերությունից` խախտելով կուսակցական նվիրատվությունների վերաբերյալ գերմանական կանոները, հաղորդում է հանրային հեռարձակողների NDR-ի, WDR-ի և Süddeutsche Zeitung թերթի կոնսորցիումը:

Այս գործը կրկին հարցականի տակ է դնում որոշ պահպանողական քաղաքական գործիչների և հարավկովկասյան հանրապետության (խմբ.-Ադրբեջան) միջև կապերը, որի առաջնորդ Իլհամ Ալիևը քննադատության է ենթարկվել իրավապաշտպան կազմակերպությունների կողմից:

Համաձայն զեկույցի՝ 2012 թվականի փետրվարի վերջին, Ֆրանկֆուրտում ՔԴԿ-ի տարածաշրջանային մասնաճյուղի հաշվին Գերմանիայում Socar-ի մասնաճյուղի կողմից 3 հազար և 25 հազար եվրոյի չափով երկու վճարումներ են իրականացվել:

ՔԴՄ-ի համար տուգանք չկա

Այս գործը խորհրդարանի վարչական մարմնի հետ կուլիսների հետևում չորս տարվա իրավական վեճի պատճառ է հանդիսացել, քանի որ Գերմանիայում օրենքը արգելում է կուսակցություններին նվիրատվություներ ստանալ ԵՄ անդամ չհանդիսացող երկրներից, ասվում է  զեկույցում:

Չնայած ՔԴՄ-ի տարածաշրջանային մասնաճյուղը ընդունել է նվիրատվությունը առանց որևէ խնդրի, Բեռլինում կուսակցության կենտրոնակայանի աուդիտորները տեղեկացրել են Գերմանիայի Բունդեսթագի վարչությանը, որն էլ դեռևս 2013 թվականի աշնանը որոշել էր, որ նվիրատվությունն օրենքով անթույլատրելի է: Այնուհետև, ՔԴԿ-ն հրաժարվեց նվիրատվությունից, իսկ գումարն անմիջապես բռնագանձվեց, ասվում է զեկույցում:

Այնուամենայնիվ, չնայած օրենքը շրջանցելուն, կուսակցությունը ստիպված չի լինի տուգանք վճարել՝ այս տարվա ապրիլին վարչական դատարանի կայացրած որոշման հիման վրա:

 Խորհրդավոր կապեր

Գործը որոշ հարցեր է առաջացրել պահպանողական ՔԴԿ/ՔՍՄ (Քրիստոնեա-սոցիալական միության) դաշինքի և Ադրբեջանի միջև կապերի վերաբերյալ, ինչպես նաև այն առումով թե ինչ նպատակներ կարող է հետապնդել երկիրը (խմբ.- Ադրբեջան) իր նվիրատվություններով:

Socar-ի գերմանական մասնաճյուղի գլխավոր գործադիր տնօրեն Անդերս Էգեն Մամեդովը նշել է, որ ընկերության շփումները քաղաքական գործիչների հետ տեղի են ունենում «Ադրբեջանի և Socar-ի աշխարհաքաղաքական կարևորության ֆոնին»: Նրա խոսքերով՝ դրա վկայությունն է նաև յոթ երկրների միջով անցնող նավթամուղային ցանցը, որն այժմ կառուցվում է:

Nabucco-West խողովակաշարի շուրջ նախագիծն ընդունվել է 2013 թվականին էներգետիկայի հարցերով այն ժամանակվա ԵՄ հանձնակատար, գերմանացի քաղաքական գործիչ,  ՔԴՄ-ի անդամ Գյունտեր Էթինգերի աջակցությամբ:

Մամեդովը նշել է, որ Socar -ը Գերմանիայում նվիրատվություներ  է կատարել նաև սպորտի և մշակութային ասոցիացիաներին:

Նա հրաժարվել է մանրամասներ ներկայացնել կամ խոսել Գերմանիայի այլ կուսակցություններին հնարավոր նվիրատվությունների մասին»,- ասվում է հոդվածում: