Մենք ստորացրեցինք Ռուսաստանին և այժմ մեծ գին ենք վճարում

Անգլիացի հայտնի գրող   Ջոն Լե Կարրեն, ում գրական ստեղծագործությունները վերաբերվում են հիմնականում սառը պատերազմի ժամանակահատվածին, Nordwest-Zeitung պարբերականին տված հարցազրույցում ներկայացրել է  Ռուսաստան-Արևմուտք այժմյան լարված հարաբերությունների պատճառները: Հարցազրույցը ներկայացնում ենք ստորև.

Ձեր նոր հրատարակված գրքում կրկին անդրադառնում եք իրադարձությունների, որոնք տեղի են ունեցել «Սառը պատերազմի»  ամենաթեժ շրջանում: Տեսնում ե՞ք արդյոք զուգահեռներ ներկայումս տեղի ունեցող Ռուսաստան-Արևմուտք  հակադրության հետ:

Կարծում եմ, որ «Սառը պատերազմի»  հետ համեմատությունը տեղին չի լինի: ԱՄՆ-ն այսօր այլ դերակատարություն ունի: Վերջինս այժմ էլ  անգութ կապիտալիստական երկիր է, սակայն այժմ նա Եվրոպայի պաշտպանը չէ: Բացի այդ,  ներկայումս չկա սոցիալիզմի և կապիտալիզմի հակադրություն: Ներկայիս հակադրությունը  համարում եմ կողմերի միջև կատաղի պայքար Եվրոպայի համար:

Ինչու՞մն է կայանում ռուսների շարժառիթը:

Ռուսաստանի մոլեգնությունը Եվրոպայի հանդեպ անսահման է: Մի կողմից նրանք ցանկանում են, որ մենք նրանց համարենք եվրոպացիներ, իսկ մյուս կողմից ուզում են ցույց տալ, որ իրենք իրենցից ավելին են ներկայացնում:  Իսկ իրականում, համոզված եմ, որ մենք մեծ գին ենք վճարում նրա համար, որ այն ժամանակ, երբ  ԽՍՀՄ-ը փլուզվեց, օգնության ձեռք չմեկնեցինք Ռուսաստանին: Չեղավ Մարշալի պլանի նման որևէ բան: Այն ժամանակ իշխում էր միայն ագահությունը՝ վերցնել այնքան, որքան հնարավոր է: Մենք նվաստացրեցինք Ռուսաստանին, որը ճակատագրական եղավ: Մենք վիրավորեցին «Արջին», իսկ այժմ Պուտինը թեժացնում է ազգայնական տրամադրությունները:

Արդյո՞ք Ձեր գրքում անդրադառնում եք «Սառը պատերազմը» հաղթող սերնդին, որը սակայն հետագայում չկարողացավ պաշտպանել արևմտյան արժեքները:

Այո, այսօր արտասովոր է, որ սոցիալ-դեմոկրատիայի վրա հարձակվում են և Արևմուտքում և Արևելքում: Պուտինին և Թրամփին միավորում է նրանց ձգտումը՝ թաղելու լիբերալ դեմոկրատիան: Ընդ որում չկա ոչինչ, որ կկարողանա փոխարինել դրան: Առաջ է գալու միայն անարխիա, ինչը ծնելու է անթիվ դեմագոգների:

-Դա համարվու՞մ է արդյոք Արևմուտքի համար ամենամեծ վտանգը:

Ես կարծում եմ այո: Ինձ վախեցնում է լիբերալ արժեքների անընդհատ բովանդակազրկումը  արևմտյան աշխարհում, որը իրականացնում է Թրամփը իսկ Եվրոպան՝ այն ընդօրինակում: Հենց Միացյալ Նահանգներից է գալիս ամենինչ սխալ անելու  ազդակները՝ ագահության, դաժանության, վրեժի իռացիոնալ գործողությունների խրախուսումը: Թրամփը ստեղծել է թունավոր մթնոլորտ, որը փոխանցում է  նաև մեզ: Նրան չպետք է արհամարհել: Նա  չի կործանվի մեկուսացման մեջ: Իսկապես նա կառուցում է   սարսափելի համակարգ, որը խրախուսում է Լեհաստանի և Հունգարիայի պոպուլիստներին և խորացնում Արևելքի և Արևմուտքի միջև պառակտումը:

Ի՞նչ լուծում եք տեսնում:

Ես հավատում եմ կրթության միջոցով հավասարության հաստատելու հնարավորությանը: Հավատում եմ, որ  կրթված հասարակությունը ժողովրդավարական ճանապարհով ընտրում է  էլիտաներ և հոգ է տանում պարտվածների մասին: Խնդիրը քաղաքականության մեջ մարդկային համակրանք ներդնելու մեջ է: Դա կարող է անմիտ թվալ, բայց  լուծումը կարող է լինել այն, որ արժանապատիվ մարդիկ գտնեն միմյանց:

Ինչպե՞ս պետք է հասնել դրան:

Ես կցանկանայի տեսնել, թե ինչպես ամերիկացի առաջատար փաստաբանները դուրս կգան փողոց: Նրանք հիանալի տեսնում են, որ  Թրամփը օրենքներ է խախտում: Մեզ հարկավոր է  արժանապատիվ մարդկանց ակտիվ  արձագանք.«Ահա այն սահմանը, որից այն կողմ մենք  այլևս չենք հանդուրժի»: