The Telegraph. «Մերկելի նոր կառավարության ձևավորումը երկար ժամանակ կպահանջի»

TELEMMGLPICT000143003909_trans_NvBQzQNjv4Bqcuhag7ufM3Z-AV0dIdDSlcuUF6t7qtXNb-k4ICiMk68

Բրիտանական The Telegraph պարբերականն անդրադարձել է Գերմանիայում կոալիցիոն կառավարության ձևավորման գործընթացին՝ նշելով, որ որոշ թիրախային հարցերի շուրջ համաձայնությունները խնդրահարույց են: Պարբերականի անդրադարձը ներկայացնում ենք ստորև.

«Գերմանիայի կանցլեր Անգելա Մերկելը հոկտեմբերի 8-ին առաջին քայլերն է ձեռնարկել նոր կառավարություն ձևավորելու ուղղությամբ՝ նպատակ ունենալով միավորել իր կուսակցության պահպանողական թևերը, որոնց միջև տարաձայնություններ են իհայտ եկել փախստականների քաղաքականության պատճառով:

Մերկելը և նրա Քրիստոնեա-դեմոկրատական միությունը (ՔԴՄ) մասնավոր զրույցներ անցկացնելու նպատակով հանդիպել են Բավարիայի պահպանողական քույր կուսակցության, Քրիստոնեա-սոցիալական միության (ՔՍՄ) առաջնորդների հետ՝ քննարկելու քաղաքականության առանցքային տարբերությունները, ներառյալ ներգաղթի վիճահարույց հարցը:

ՔՍՄ-ն կիրակի օրը Bild պարբերականում հրապարակեց 10 կետեր ներառող պահանջների ցանկ՝ փախստականների թվի «վերին սահման»-ի և «առողջ հայրենասիրության» հայեցակարգին հանձնառու լինելու վերաբերյալ:

ՔԴՄ-ի և ՔՍՄ-ի միջև համագործակցության ձախողման դեպքում, Մերկելը ստիպված կլինի դիմել փոքրամասնության կառավարության ձևավորմանը կամ անցկացնել նոր ընտրություններ՝ ունենալով անցյալ ամիս կայացած դաշնային ընտրություններում սպասվածից ավելի վատ արդյունք:

Ներքին գործերի նախարար Թոմաս դե Մայզիերեն շաբաթ օրը Դրեզդենում հայտարարել էր արագ կառավարություն ձևավորելու անհրաժեշտության մասին: Հաշվի առնելով, որ նա կարող է միջնորդ դառնալ ՔՍՄ-ի հետ, Մերկելը ձգտում է այսպես կոչված «Ջամայկա կոալիցիային»՝ միավորելով իր ՔԴՄ/ՔՍՄ-ն Ազատ դեմոկրատական կուսակցության և «Կանաչների» հետ:

Սակայն մինչ բանակցություններ սկսելը, Մերկելը ստիպված է իր կոալիցիայի ներսում համաձայնություն գտնել, ինչը հեշտ գործ չէ: ՔՍՄ-ի առաջնորդ Հորսթ Զեեհոֆերը Մերկելին մեղադրում է 2015 թվականի «բաց դռների» քաղաքականության համար, ինչը հանգեցրեց «Այլընտրանք Գերմանիայի համար» (ԱԳՀ) կուսակցության վերելքին, ովքեր 93 տեղ զբաղեցրին նոր Բունդեսթագում: Զեեհոֆերը սպառնում է, որ ՔՍՄ-ն դուրս կգա ցանկացած կոալիցիայից, եթե Մերկելը չհամաձայնի 200 հազար փախստականների թվաքանակի ամենամյա սահմանափակման դրույթին, որը Գերմանիայում համարվում է թույլատրելի: Որպես կուսակցության ղեկավար դիրքում գտնվող, նա կարծես թե չի պատրաստվում տեղի տալ:

Այնուամենայնիվ, Մերկելն, ով այս ամռանն ավելի վաղ պաշտպանել էր իր «բաց դռների» քաղաքականությունը փախստականների հարցում, հայտարարել էր, որ իր կարծիքով, սահմանափակումը կլինի անարդյունավետ և հակասահմանադրական:
Ամիսներ կարող են պահանջվել կոալիցիոն համագործակցության հասնելու համար: Զեեհոֆերը հայտարարել է, որ վերջին քննարկումներն երկու կուսակցությունների միջև «ամենադժվարն են 1976 թվականից ի վեր», երբ նրանք պառակտվեցին: ՔՍՄ-ի գլխավոր քարտուղար Անդրեաս Շոուերը նույնպես ակնարկել է առաջիկայում երկարաժամկետ և դժվարին բանակցությունների մասին»,- ասված է հոդվածում: