Սիրիայի կառավարական բանակը գրեթե ամբողջությամբ իր հսկողության տակ է վերցրել երկրի մեծությամբ երկրորդ քաղաք Հալեպը: Մի քանի տարի տևող քաղաքացիական պատերազմի ընթացքում սա Բաշար Ասադի իշխանության ամրապնդման համար բավականին կարևոր ձեռքբերում է, որը կարող է էական նշանակություն ունենալ հակամարտության հետագա ընթացքի վրա:
Հալեպի գրավման և դրա հետևանքների մասին ներկայացնում ենք «Deutsche Welle» գերմանական գործակալությանը Ռայներ Հերմանի կողմից ներկայացված դիտարկումները: Նշենք, որ Հերմանը քաղաքական մեկնաբան է «Frankfurter Allgemeine Zeitung» (FAZ) պարբերականում:
«Արդեն 2 տարի է, ինչ սիրիացի ապստամբների գլխավոր հենակետը հանդիսացող Հալեպը պաշարման մեջ է, իսկ վերջին 4 ամիսների ընթացքում քաղաքի շուրջ օղակը սեղմվում է: Քառորդ միլիոն մարդ զրկված է սննդամթերք, դեղորայք և վառելիք հայթայթելու հնարավորությունից: Նոյեմբերի 27-ից Հալեպի թաղամասերը մեկը մյուսի հետևից անցնում են Սիրիայի կառավարական զորքերի ու նրանց դաշնակիցների հսկողության տակ: Ապստամբներին սովի մատնելու և ռմբակոծելու Բաշար Ասադի մարտավարությունը, փաստորեն, արդյունավետ ստացվեց: Սիրիական քաղաքացիական պատերազմի ընթացքում 2016թ-ը Դամասկոսի համար կարելի է համարել բավականին հաջողակ տարի:
Հալեպի համար մեծ ճակատամարտը շուտով կավարտվի, սակայն ապստամբների ու կառավարական ուժերի միջև պատերազմը Սիրիայում դեռ կշարունակվի: Զինված գրոհայինները ապաստան են փնտրում Թուրքիայի սահմանից ոչ հեռու Իդլիբ նահանգում, որտեղ տոնել են իրենց առաջին հաջողությունները Ասադի ռեժիմի դեմ պայքարում: Այնտեղից նրանք կշարունակեն հարձակումները կառավարական զորքերի կողմից վերահսկվող Հալեպ և Լաթաքիա քաղաքաների ուղղությամբ: 5 տարի տևող սարսափելի ու ավերիչ պատերազմից հետո դժվար է պատկերացնել կամ հավատալ, որ Բաշար ալ Աաադի կառավարության կողմնակիցներն ու հակառակորդները մի օր կսկսեն հաշտ ու խաղաղ ապրել նույն քաղաքում: Այդուհանդերձ, Հալեպի կորուստը էականորեն թուլացնում է ապստամբների դիրքերը:
Ուստի սիրիայի առաջնորդ Բաշար Ասադն այժմ հնարավորություն է ստանում իր դիրքերը երկրի տարածքի մեծ մասում ամրապնդելու համար, նամանավանդ, որ ապստամբներն ԱՄՆ-ի նորընտիր նախագահ Դոնալդ Թրամփից մեծ ակնկալիքներ չունեն: Թուրքիայի կողմից աջակցություն ևս չկա, թեև Էրդողանն օգտագործում է Ապստամբներին՝ Սիրիայի հյուսիսում քրդերի ազդեցությունը սահմանափակելու համար:
Ասադը պետք է ազատություն շնորհի:
Բաշար Ասադի համար իր հակառակորդների հետ փոխըմբռնում գտնելու հնարավորություն է ստեղծվել: Կարելի է ենթադրել, որ հիմա նա կփորձի ամեն կերպ աջակցություն ցուցաբերել Հալեպի բնակչությանը՝ նրանց ապահովելով էլեկտրականությամբ ու սննդամթերքով: Թեև դժվար կլինի միայն կենսական անհրաժեշտությունների մատակարարմամբ նվաճել Հալեպի բնակիչների սիրտը: Այդ նպատակի համար Ասադը ստիպված կլինի ազատականացնել իր միահեծան ռեժիմն ու Հալեպի բնակիչներին շնորհել քաղաքական ազատություններ:
Բայց Ասադը դեռ պատրաստ չէ նման քայլի գնալու համար: Իսկ դա նշանակում է, որ նրա ռեժիմի դեմ պայքարը կշարունակվի նաև Հալեպի անկումից հետո»:
Ռայներ Հերման, «Frankfurter Allgemeine Zeitung» պարբերականի քաղաքական մեկնաբան