Հայաստանին ծանոթանալու լավ առիթ

2016 թվականի դեկտեմբերի 3-ին Լեհաստանում ՀՀ դեսպանության նախաձեռնությամբ տեղի է ունեցել հայ-լեհական դիվանագիտական հարաբերությունների հաստատման 25-ամյակին և Լեհաստանի հայ համայնքի կազմավորման 650-ամյակին նվիրված հոբելյանական միջոցառումների կազմակերպման հանձնաժողովի նիստ, որը վարում էր Լեհաստանում ՀՀ դեսպան Էդգար Ղազարյանը: Միջոցառմանը մասնակցում էին դեսպանության աշխատակիցներ, Լեհաստանի տարբեր քաղաքներից ժամանած հայ համայնքների և հայկական կազմակերպությունների ղեկավարներ և ներկայացուցիչներ, հասարակական-քաղաքական գործիչներ, գիտնականներ, նկարիչներ և այլք:

Իր խոսքում դեսպան Էդգար Ղազարյանը, ընդգծելով 2017 թվականին կայանալիք երկու մեծ հոբելյանների կարևորությունը, ընդգծեց, որ ողջ տարվա ընթացքում Լեհաստանի տարբեր քաղաքներում կայանալիք տարաբնույթ միջոցառումները նաև հրաշալի առիթ են ստեղծում լեհ հասարակությանը առավելագույնս ներկայացնելու Հայաստանը, հայ ժողովրդի հարուստ պատմությունը, մշակույթը, Լեհաստանի հայ համայնքի անցած յուրօրինակ ճանապարհը, ինչպես նաև նրա ունեցած կարևոր դերակատարումը Լեհաստանի պատմության մեջ: Դեսպան Ղազարյանը հանձնաժողովի անդամներին ներկայացրեց ծրագրված միջոցառումների նախապատրաստական աշխատանքները:

Հոբելյանական հանձնաժողովի նիստի ընթացքում տեսակոնֆերանսի միջոցով ուղիղ կապ հաստատվեց նաև ՀՀ սփյուռքի նախարարության հետ: ՀՀ սփյուռքի նախարարությունից տեսակոնֆերանսին մասնակցում էին նախարարի տեղակալներ Սերժ Սրապիոնյանը և Վահագն Մելիքյանը, նախարարության մի շարք կառուցվածքային ստորաբաժանումների և առանձին ծրագրերի ղեկավարներ, որոնք իրենց հերթին ներկայացրեցին ՀՀ սփյուռքի նախարարության կողմից իրականացվող ծրագրերը` ակնկալելով դրանցում Լեհաստանի հայ համայնքի ակտիվ ներգրավվածությունը և մասնակցությունը:

Լեհաստանից ելույթներով հանդես եկան Լեհահայոց մշակութային ժառանգության հիմնադրամի նախագահ Յան Աբգարովիչը, Լեհաստանի Հայ դատի հանձնախմբի ատենապետ Արա Սայեղը, «Արմենիա ֆաունդեյշն» հիմնադրամի խորհրդի նախագահ Մարթա Աքսենտովիչ-Բոհոսևիչը, Հայ-լեհական հիմնադրամի նախագահ Արսեն Հովսեփյանը, Հայ-լեհական համագործակցության կազմակերպության նախագահ Կարեն Շահումյանը, հայկական խոհանոցի մասնագետ Դիանա Վոլոխովա-Սարգսյանը, Վարշավայի Կարդինալ Վիշինսկու անվան համալսարանի պրոֆեսոր Վալդեմար Դելուգան: Վերջիններս ներկայացրեցին իրենց կազմակերպությունների կողմից նախատեսվող ծրագրերն ու միջոցառումները, որոնց թվում են հայագիտական գիտաժողովներ, մշակութային միջոցառումներ և այլն: Անդրադարձ կատարվեց նաև լեհահայ համայնքում առկա հիմնախնդիրներին և դրանց լուծման ուղղությամբ ՀՀ սփյուռքի նախարարության հետ համագործակցությամբ ձեռնարկվելիք քայլերին:

Դեսպան Էդգար Ղազարյանի գրառումը Facebook-ում