Չեմ կարող բեռ դառնալ

Հայկական բարեգործական ընդհանուր միության 110-ամյակի միջոցառումների շրջանակներում կազմակերպված քննարկմանը վարչապետ Կարեն Կարապետյանը`  պատասխանելով իր  հետագա պաշտոնավարման հետ կապված հարցին`  նշեց, որ ինքը չի եկել ընդամենը 6 ամսով աշխատելու և ցանկություն կա երկարատև աշխատելու եթե հաջողակ լինի:

«Ես չեմ կարող  բեռ դառնալ, եթե ես էֆեկտիվ չլինեմ», -ընդգծեց վարչապետը:

Հարցին` ինչպե՞ս եք պլանավորում համատեղել  կառավարության երկարաժամկետ և կարճաժամկետ  նպատակները վարչապետը պատասխանեց, որ առաջինը կարճաժամկետ ծրագիրն է միտված  արագ փոփոխության, արագ հաղթանակի, երկրորդ փուլը` երկարաժամկետ տեսլական է, որը  ցանկանում ենք իրականացնել պետություն, մասնավոր սեկտոր, ընդ որում լայն ընդգրկումով սփյուռքահայ մեր գործընկերներին:

«Կարծում եմ, որ կառավարության առաջնահերթ խնդիրներից մեկն է արդար հավասար ու մրցունակ դաշտ ստեղծելը: Մի քանի անգամ ասել եմ, տարբեր ռեյթինգներով, տարբեր հարցումներով՝ ամենաերջանիկ երկրները նրանք են, որոնք ստեղծել են մաքսիմալ բարենպաստ միջավայր աշխատող մարդու համար, հավելյալ արժեք ստեղծող մարդու համար, ստեղծագործ մարդու համար: Այդ երկրների մեջ չկան երկրներ, որոնք ունեն նավթ, գազ կամ այլ պաշարներ: Այդ իսկ պատճառով մենք պետք է առաջինը ստեղծենք հավասար, արդար, մրցունակ պայմաններ աշխատող մարդու, գործարար մարդու համար: Այս պահին միայն դա բավարա՞ր է, որ մեր տնտեսությունը աշխուժանա: Կարծում ենք՝ ոչ այնքան և մենք պատրաստ ենք մեզ վրա վերցնել որոշակի խթանողի դերակատարում՝ ինչն ըստ իս այնքան էլ պետության գործառույթը չէ, որպեսզի բիզնեսը ոգևորվի, աշխուժանա», —  կառավարության առաջնահերթությունները ներկայացրեց վարչապետը:

Այն հարցին` արդյոք կարող ենք ունենալ «Գլոբալ Հայերի»  նամակի մեջ մատնանշված անվտանգ, խաղաղ,  զարգացած ու ժամանակակից Հայաստան կառուցել վարչապետ Կարեն Կարապետյանը վստահեցրեց,  որ դրան կարող ենք հասնել համախմբելով մեր բոլոր ուժերը, ամբիցիոզ նպատակներ դնելով և հաստատակամ դրան գնալով:

«Մենք ունենք ֆանտաստիկ պոտենցիալ: Ամենամեծ կապիտալը մարդկային կապիտալն է: Ես չափից շատ կարևորում եմ Սփյուռքի կողմից կառավարման գործընթացի մեջ մասնակցելը, այդ մշակույթը բերելը: Որևիցե մեկի համար գաղտնիք չէ, որ օրինակ սիրիահայերը գալով Հայաստան ծառայությունների, սպասարկման և ռեստորանային բիզնեսը որակապես փոխվել է: Կարող եմ բազում կետեր թվարկել և հաստատել, որ Սփյուռքի և Հայաստանի միջև փոխհամագործակցությունը մեզ կտա մուլտիպլիկատիվ էֆֆեկտներ»,- անդրադառնալով Հայաստան-Սփյուռք կապերին  շեշտեց վարչապետը` հավելելով, որ կոնտակտը պետք է ստեղծենք, ռեգուլյար հիմքով, որպեսզի մեկս մյուսին լսենք և հասկանանք:

Կարեն Կարապետյանը միևնույն ժամանակ շեշտեց, որ անընդհատ սփյուռքին դիմել՝ որպես բարեգործության աղբյուր, անհեռանկարային է և ինքնասիրության խնդիրներ առաջացնող:

Վարչապետի խոսքով` Հայաստանն առանց սփյուռքի մասնակցության թեև կարող է գոյատևել, ապրել, սակայն սփյուռքահայության հետ հնարավորությունները կրկնապատկվում, տասնապատկվում են, և ինչո՞ւ դրանք չօգտագործել:

Հարցին, թե ինչպես է վերաբերվում այն հանգամանքին, որ կառավարության անդամներից մեկը կամ մի քանիսը բիզնեսի սեփականատեր են, ընդ որում այն ոլորտում, որտեղ ղեկավարում են, վարչապետն  շեշտեց, թե պարզ է, որ պետական ծառայողը դա պետք է բացառի, որովհետև կա շահերի բախում:

«Ես վստահ եմ իրենց մաքրության վրա և վստահ եմ, որ պետական ատյանը չեն օգտագործելու իրենց բիզնեսը լոբբինգ անելու կամ պաշտոնը չեն օգտագործելու անձնական հարստացման համար: Բայց ինձ պետք է մարդ գա, ով, ժողովրդական խոսքով ասած, աչքը աջ ու ձախ չնետի»,-իր նախարարներին այսպես նկարագրեց վարչապետը` հավելելով, որ ի վերջո պետք է գան այնպիսի  պետական համակարգի, որ պետական ծառայողի աշխատավարձը լինի մոտիվացնող, որ նա արժանապատիվ քայլեր իրականացնի: