Հանրագումարի բերելու առիթ

Այսօրն աշխարհում նշվում է հաշմանդամություն ունեցող մարդկանց միջազգային օրը:
Սա լավ առիթ է մեկ անգամ ևս հանրագումարի բերելու Երևանը բոլորի համար մատչելի դարձնելու ուղղությամբ կատարած մեր աշխատանքները:

Անխոս, քաղաքային միջավայրը վերջին տարիներին փոխվել է. հասարակական տրանսպորտում և հանրային նշանակության վայրերում ավելացվել են հենաշարժողական խնդիրներ ունեցող անձանց համար համապատասխան վերելակները, շարունակվել են թեքահարթակների կառուցման աշխատանքները, տեսողության հետ կապված խնդիրներ ունեցող անձանց համար հարմարեցվել են լուսաֆորներ և այլն:
Սակայն այս ամենը մատչելի քաղաք ունենալու տեսլականի միայն առաջին քայլերն են: Դեռևս շատ անելիքներ ու ծրագրեր ունենք և, համոզված եմ, որ դրանք ևս հաջողությամբ կյանքի կկոչենք:

Նաև ուզում եմ հատուկ շնորհակալություն հայտնել բոլոր այն անձանց և կազմակերպություններին, որոնք իրենց խորհրդատվությամբ ու անմիջական մասնակցությամբ օգնել և շարունակում են օգտակար լինել մատչելի քաղաքի կառուցման մեր ծրագրին:

Ի վերջո, մատչելի քաղաքը ոչ միայն հաշմանդամություն ունեցող անձանց է անհրաժեշտ, այլ բոլորին:
Իսկ Երևանը բոլորինս է, մեր բոլորի սիրելի մայրաքաղաքը:

Տարոն Մարգարյանի գրառումը Facebook-ում