Նվեր կառավարությունից

old-greenhouse_574991807

ՀԾԿՀ-ն հրապարակել է սպառողներին վաճառվող բնական գազի սակագների վերանայման վերաբերյալ որոշման նախագիծը,  որը նոյեմբերի 15-ին նախատեսվում է քննարկել սպառողների շահերը պաշտպանող կազմակերպությունների և «Գազպրոմ Արմենիա» ՓԲԸ-ի ներկայացուցիչների հետ:

Նախագիծը, որը մշակվել է «Գազպրոմ Արմենիա» կազմակերպության կողմից ներկայացված հայտի համաձայն, նախատեսում է բացի գործող երկու խումբ սպառողներից, առանձնացնել ևս երեք խումբ` սոցիալապես անապահով ընտանիքներ, ջերմոցային տնտեսություններ և գյուղատնտեսության ոլորտում գործունեություն իրականացնող վերամշակող տնտեսություններ:

Դատելով նախատեսվող նոր սակագների բանաձևերից` սոցիալապես անապահով այն ընտանիքները, որոնք կծախսեն ամսական մինչև 600 խորանարդ մետր բնական գազ, 1 խմ գազի համար կվճարեն 100 դրամ: Իսկ սոցիալապես անապահով այն ընտանիքները, որոնք մեկ ամսվա ընթացքում կծախսեն 600 խորանարդ մետր բնական գազից ավել, ապա նրանց համար սակագինը կկազմի 139 դրամ` 1 խմ գազի դիմաց:

Ջերմոցային տնտեսությունների համար գազի սակագինը սահմանվել է երկու առանձնացված  ժամանակահատվածի համար: Նոյեմբերի 1-ից մինչև մարտի 31-ը գազի սակագինը հաշվարկվելու է «212xE» բանաձևով, այսինք` գազի գինը կախված է լինելու E-ից` ԱՄՆ դոլարի փոխարժեքից: Փաստացի` նոյեմբեր ամսվա համար 1 խմ գազի սակագինը կազմելու է մոտ 100,75 դրամ:

Ջերմոցային տնտեսությունների համար ապրիլի 1-ից մինչև հոկտեմբերի 31-ը ամսական մինչև 10,0 հազար խորանարդ մետր սպառում ունեցող սպառողների համար 1 խմ գազի սակագինը կազմելու է 139 դրամ, իսկ ամսական 10,0 հազար խորանարդ մետր և ավելի սպառում ունեցող սպառողների համար` գոծելու է «242.1xE» բանաձևը, որտեղ E-ն յուրաքանչյուր հաշվետու ամսվան նախորդող ամսվա 25-ին արժութային շուկաներում ձևավորված միջին փոխարժեքի մեծությունն է (ներկայիս փոխարժեքով` 115 դրամ` 1 խմ գազի դիմաց):

Գյուղատնտեսության ոլորտում գործունեություն իրականացնող վերամշակող՝ պահածոների, խմիչքների և կաթնամթերքի արտադրությամբ զբաղվող, անձանց վաճառվող գազի սակագինը ևս հաշվարկվելու է «212xE» բանաձևով, սակայն ի տարբերություն ջերմոցային տնտեսությունների` այն չի փոխվելու ապրիլի 1-ից և մնալու է նույնը ողջ տարվա համար: Այս դեպքում ևս նոյեմբեր ամսվա համար 1 խմ գազի սակագինը կազմելու է մոտ 100,75 դրամ:

Հաջորդ երկու ավանդական սպառող խմբերի համար սակագները նույնպես փոխվելու են: Ամսական մինչև 10,0 հազար խորանարդ մետր սպառում ունեցող սպառողների համար 1 խմ գազի սակագինը կազմելու է 139 դրամ, իսկ ամսական 10,0 հազար խորանարդ մետր և ավելի սպառում ունեցող սպառողների համար` գոծելու է «242.1xE» բանաձևը, որը նոյեմբեր ամսվա համար կազմելու է 115 դրամ` 1 խմ գազի դիմաց: