ՌԴ-ն հետ է կանչում Հռոմի ստատուտի ստորագրությունը

exterior of Eurojust, an agency of the European Union dealing with judicial co-operation, and the International Criminal Court (ICC), the permanent tribunal to prosecute individuals for genocide, crimes against humanity, war crimes, and the crime of aggression; The Hague, Netherlands

Ռուսաստանի նախագահ Վլադիմիր Պուտինը հրամանագիր է ստորագրել, որով Ռուսաստանը դուրս է գալիս Միջազգային քրեական դատարանի (Հաագայի դատարան) մասին համաձայնագրից: Համապատասխան հրամանագիրը ՌԴ Արտաքին գործերի նախարարությունը պետք է ուղարկի ՄԱԿ-ի Գլխավոր քարտուղարին՝ որպես ի գիտություն:

2630702

Պատճառը Հաագայի դատարանի կողմից Ղրիմի շուրջ ռուս-ուկրաինական հակամարտության վերաբերյալ հրապարակված զեկույցն ու դրանում Ղրիմի հանդեպ Ռուսաստանի գործողություններին տրված սուր բնութագրումներն են:

Օրինակ զեկույցի 158-րդ դրույթում կարդում ենք. «Ստացվող վկայությունների համաձայն Ղրիմում և Սևաստոպոլում իրավիճակը նույնական է Ռուսաստանի Դաշնության և Ուկրաինայի միջև միջազգային ռազմական հակամարտության հետ: Այդ միջազգային հակամարտությունը սկսվել է 2014 թվականի փետրվարի 24-ից ոչ ուշ, երբ Ռուսաստանի Դաշնությունը, կիրառելով իր անձնական զինվորական ուժը, վերահսկողություն է սահմանել Ուկրաինայի տարածքի մի մասի վրա՝ առանց Ուկրաինայի կառավարության համաձայնության»:

Նույն կետով նաև նշվում է, որ միջազգային ռազմական հակամարտության իրավունքը տարածվում է նաև 2014 թվականի մարտի 18-ից հետո իրավիճակի վրա՝ շարունակվող օկուպացիայի պայմաններում:

Զեկույցը ներառում է նաև այլ խիստ բնորոշումներ Ռուսաստանի գործողությունների մասով, ինչպես օրինակ այն, որ «ռուսական օկուպացիան ուղեկցվել է ղրիմի թաթարներին ահաբեկելով ու կաշկանդելով՝ ներառյալ այնպիսի մեխանիզմներով, ինչպես Ղրիմից ելքի թույլտվության արգելումը, միավորումներ կազմելու և խոսքի իրավունքի իրացման սահմանափակումները»:

Ըստ փորձագիտական շրջանակների՝ թեև Ռուսաստանը ստորագրել է, սակայն չի վավերացրել Հռոմի ստատուտը, այդուհանդերձ դա արդեն հիմք է, որը կբացառի Ռուսաստանի կողմից զեկույցում տեղ գտած ձևակերպումներն ամբողջությամբ անտեսելը: Մյուս կողմից էլ, փաստաթուղթը լուրջ միջազգային կշիռ կարող է ձեռք բերել տարբեր ատյաններում՝ դառնալով Ուկրաինայի ձեռքին կարևոր խաղաթուղթ իր հակառուսական դիրքորոշումը հիմնավորելու համար: Փորձագիտական շրջանակները պնդում են, որ հենց այս մտահոգություններից ելնելով էլ Ռուսաստանի նախագահը համապատասխան հրամանագրով որոշում է կայացրել դադարեցնել Հաագայի դատարանի մասին համաձայնագրին Ռուսաստանի մասնակցությունը:

Ռուսաստանի համար այս և նման այլ զեկույցներով պայմանավորված վատագույն ելքը կարող է լինել Ղրիմի հարցով միջազգային տրիբունալի հրավիրումը, ինչը, սակայն, ըստ գնահատականների, հնարավոր չէ գոնե այնքան ժամանակ, մինչև Ռուսաստանը ՄԱԿ-ի ԱԽ-ում ունի վետոյի իրավունք: