ԱՄՆ-ն վերահաստատում է աջակցությունը

Վիեննայում՝ ԵԱՀԿ Մշտական խորհրդին ուղղված ելույթում  կազմակերպությունում ԱՄՆ մշտական ներկայացուցիչ, դեսպան Դենիել Բիրը պատրաստակամություն է հայտնել Ղարաբաղյան կարգավորման շրջանակներում համագործակցել Մինսկի խմբի համանախագահների և այլ իսնտիտուտների հետ: Նա մասնավորապես ասել է. 

Միացյալ Նահանգները ջերմորեն ողջունում է Մինսկի խմբի համանախագահներին, գործող նախագահի անձնական ներկայացուցչին և Մշտական խորհրդում Բարձր պլանավորման խմբի ղեկավարին: Մենք վերահաստատում ենք մեր աջակցությունը նրանց աշխատանքին և գնահատում ենք նրանց անխախտ ներգրավվածությունը կողմերի հետ միասին՝ առաջ մղելու Լեռնային Ղարաբաղի հակամարտության խաղաղ կարգավորումը:

Միացյալ Նահանգները անհանգստացած էր ապրիլին շփման գծում բռնության աճով և մտահոգված էր դաժանությունների մասին հաղորդումներով: Որպես համանախագահ երկիր՝ Միացյալ Նահանգներն անմիջապես քայլեր ձեռնարկեց լարվածությունը մեղմացնելու ուղղությամբ: Պետքարտուղար Քերին նախաձեռնեց մայիսի 16-ին Վիեննայում 3+2 ձևաչափով հանդիպում՝ գիտակցելով, որ Միացյալ Նահանգների, Ռուսաստանի և Ֆրանսիայի միացյալ ջանքերն ամենաբարձր մակարադակով կարող են օգնել կողմերին՝ դադարեցնել բռնությունը և առաջ մղել խաղաղ գործընթացը: Գագաթաժողովն ունեցավ շոշափելի արդյունքներ: Կողմերն վերահաստատեցին իրենց հարգանքը հրադադարի ռեժիմի պահպանման հետ կապված, և իրականում, իրավիճակը շփման գծում նշանակալիորեն հանդարտվեց:

Միացյալ Նահանգներն աջակցում է վստահության կառուցմանն ուղղված միջոցառումներին և հայերի ու ադրբեջանցիների միջև մեծացող երկխոսությանը, որը կարող է օգնել կայունացնել անվտանգային դրությունը և ստեղծել ավելի կառուցողական մթնոլորտ բանակցությունների համար:

Միացյալ Նահանգները գնահատում է Գերմանիայի Նախագահության և Գործող նախագահի անձնական ներկայացուցիչ Անջեյ Կսպրշչիկի սերտ համագործակցությունը՝ աջակցելու համանախագահների միջնորդական ջանքերին և տեղում իրավիճակի կայունացմանը:

Մենք կիսում ենք կողմերի այն դժգոհությունը, որ այս հակամարտությունը տևական ժամանակ է ինչ շարունակվում է: Այս հակամարտությանը չկա ռազմական լուծում: Որպես ԵԱՀԿ Մինսկի խմբի համանախագահ երկիր՝ ԱՄՆ-ն խորապես հանձնառու է, ինչպես այս առավոտ շեշտել է դեսպան Ուորլիքը, աշխատել կողմերի հետ՝ գտնելու հակամարտության խաղաղ և տևական լուծում:

Մենք միանում ենք բոլոր նրանց, ովքեր այս առավոտ իրենց բերամաղթանքներն են հղել դեսպան Անդրեին իր հետագա գործունեության համար և ողջունել են նրան փոխարինողին՝ դեսպան Վիսկոնտին: Մենք անհամբերությամբ սպասում ենք Ձեզ հետ աշխատելուն:

Ելույթի տեքստը ԵԱՀԿ-ում ԱՄՆ մշտական ներկայացուցչության կայքից