Քրոնիկ ինքնավստահություն, թե՞

Միացյալ Նահանգներում կայացած նախագահական ընտրությունների ելքն իսկական անակնկալ  էր շատերի համար, քանի որ կանխատեսումների համաձայն` ԱՄՆ 45-րդ նախագահ պետք է դառնար  նախկին պետքարտուղար Հիլարի Քլինթոնը: Այս առիթով Ամերիկյան Politico հրատարակությունը վերլուծել է իրավիճակն ու ներկայացրել դեմոկրատների թեկնածուի անսպասելի պարտության գլխավոր պատճառները:

«Քլինթոնի պարտության պատճառների մասին խոսվելու է դեռ երկար ժամանակ, սակայն հիմա դրանցից ամենաակնհայտն այն է, որ նա չափից ավելի ինքնավստահ էր»,- գրում է անդրադարձի հեղինակ Թոդ Ս. Պուրդումը` նկատելով, որ Քլինթոնի պարագայում գործ ունենք ինքնավստահության քրոնիկ դեպքի հետ:

Հեղինակը նկատում է, որ 2008 թվականի նախագահական մրցապայքարի ժամանակ, երբ Դեմոկրատական կուսակցությունից նախագահի թեկնածուն դառնալու համար Քլինթոնի մրցակիցն էր Բարաք Օբաման, նա կրկին գործեց նույն սխալը: Նա վստահ էր, որ Օբաման իր համար լուրջ մրցակից չէ. չափից ավելի ինքնավստահությունը Քլինթոնին դուրս թողեց նախագահական մրցապայքարից, իսկ Օբաման արդյունքում դարձավ նախագահ:

Վերադառնալով այս տարվա նախագահական քարոզարշավի թեմային` Պուրդումը գրում է, որ Քլինթոնն ավելորդ համարեց այցելել այն նահանգները, որոնք ավանդաբար քվեարկում են դեմոկրատների օգտին:

Բացի այդ, Քլինթոնը բացեիբաց ծիծաղում էր Թրամփի այն խոսքերի վրա, թե հանրապետականների թեկնածուն կարող է «ձևափոխել ընտրողների քարտեզը»: Սակայն արդյունքում այնպես ստացվեց, որ մի շարք նահանգներում, որտեղ սովորաբար քվեարկում են դեմոկրատների օգտին, այս անգամ ընտրեցին հանրապետական Թրամփին: Իսկ դա հանգեցրեց Քլինթոնի պարտությանը: