Ռազմական տանկերի մոդեռնիզացիա

Հայաստանն ու Ռուսաստանն իրականացնում են T-72 հիմնական ռազմական տանկերի մոդեռնիազացման լայնածավալ ծրագիր: Տանկերը կմոդեռնիզացվեն T-72Б4 մակարդակով: Ի դեպ T-72Б4 տանկով են մասնակիցները հանդես եկել նախորդիվ անցկացված «Տանկային բիաթլոն»-ում: «Իզվեստիա» ռուսական պարբերականի հետ զրույցում ՀՀ ՊՆ պաշտոնական ներկայացուցիչ Արծրուն Հովհաննիսյանը հայտնել է, որ մոդեռնիզացման աշխատանքներն արդեն մեկնարկել են:

Պարբերականի հետ զրույցում Հովհաննիսյանը նշել է, որ Т-72Б4 մակարդակով մոդեռնիզացված տանկերն աչքի են ընկնում մանևրելու ակնհայտ բարելավված հատկանիշներով և մարտական բարձր ցուցանիշներով: Բացի այդ հիմնական աշխատանքները կիրականացվեն Հայաստանում, ինչը թույլ կտա հայկական կողմին ավելի քիչ ռեսուրսներ ծախսել, իսկ դա խոսում է այն մասին, որ հնարավորություն կա մոդեռնիզացնել ավելի շատ քանակի տանկեր:

Ռուսական Զինված ուժերում առկա Т-72Б3 տարբերակից բիաթլոնյան տարբերակը տարբերվում է ամբողջովին փոփոխված կախովի սարքավորումներով և ագրեգատներով: Հայկական տանկերը կստանան այնպիսի շարժիչներ, որոնք առանց ռեսուրսի գերծախսի կունենան 1130 ձիաուժ հզորություն, կատարելագործված  հովացման համակարգով: Բացի այդ Т-72Б4-ը ունի այնպիսի թրթուրավոր շղթա հատուկ դիզայնով, որի շնորհիվ տարատեսակ գրունտային հիմքի վրա ապահովվում է լավագույն կցորդում, ինչն էլ հանդիսանում է տանկի մանևրելու նախապայմանը:

Б4 տարբերակն ունի ժամանակակից բազմալիքային «Сосна-У» նշանոց, ինչը հնարավորություն է տալիս տանկին գործել նաև գիշերային պայմաններում: Բիաթլոնյան տարբերակում տեղադրված է եղել շրջանաձև դիտարկման համալիր, որի միջոցով օրվա ցանկացած ժամի տանկի հրամանատարը կարողանում է հայտնաբերել թիրախները և հայտնել նշանառուին: Այս համալիրը «Կալինա» կրակի կառավարման համակարգի մաս է կազմում, որը տեղադրված է նաև T90MC տանկի վրա: Այն հնարավորություն ունի աշխատել նաև հեռակառավորվող զենքի, ինչպես նաև ինքնաոչնչացող զինամթերքների հետ:

«Т-72Б4 և T-90 տանկերը եթե համեմատելու լինենք, ապա բիաթլոնյան տարբերակը գերակայում է T-90-ին, իր հզոր շարժիչի շնորհիվ ունեցած շարժունակությամբ և համեմատաբար թեթև քաշով: Բիաթլոնյան տարբերակը ունի կրակի կառավարման ավելի արդյունավետ համակարգ իր տեսանելիության լավացման և գիշերային մարտ վարելու հնարավորությամբ»,- «Իզվեստիա»-ի հետ զրույցում, նման տեսակետ է հայտնել անկախ ռազմական փորձագետ Ալեքսեյ Խլոպոտովը և հավելել, որ T-90-ը պաշտպանված է ավելի հաստ պաշտպանիչ շերտով և ունի հեռակառավարվող գնդացիր:

Օրեր առաջ Երևանում անցկացված «ArmHiTec 2016» սպառազինությունների միջազգային ցուցահանդեսի ժամանակ «Ուրալվագոնզավոդ»-ի ներկայացրած Т-72Б4 տանկն ուներ հեռակառավարվող գնդացիր: Սա նշանակում է, որ հնարավոր է T-72-ի վրա տեղադրել նման համակարգ մոդեռնիզացման ժամանակ: