Առհասարակ Հայաստանում նոր սահմանադրության ընդունումից հետո բավականին շատ էր հնչում այն կարծիքը, որ իրավական այս պայմաններում մենք կունենանք ընդամենը մեկ-երկու կուսակցություն, որոնք էլ ներկայացված կլինեն ԱԺ-ում, ինչը ոմանց կողմից գնահատվում էր դրական, մյուսների կողմից՝ որպես մարդու ընտրական իրավունքի սահմանափակում և քաղաքական կյանքի մոնոպոլիզացիա:
Բայց փաստերը վկայում են, որ մենք ԱԺ առաջիկա ընտրությունների նախաշեմին, կարծես թե, ունենալու ենք աննխադեպ մեծ թվով կուսակցություններ: Դրա մասին է վկայում և՛ նոր կուսակցությունների ստեղծումը, և՛ արդեն բոլորին հայտնի կուսակցությունների վերանվանումները և միավորումները, և վերջերս երկրի քաղաքական երբեմնի երկրորդ ուժի՝ ԲՀԿ-ի նախկին ղեկավարի շուրջ պտտվող լուրերը քաղաքականություն վերադառնալու հնարավորության մասին:
Քաղաքական դաշտում նկատվող ատոմիզացիան բխում է իշխող կուսակցության շահերից
Իրականում, ամենայն հավանականությամբ, գործ ենք ունենալու իշխող կուսակցության այլ պլանի հետ, ըստ որի` որքան տարբեր փոքր կուսակցություններ փախցնեն ընտրողի ձայներն, այնքան լավ, քանի որ նոր սահմանադրությունը հնարավորություն է տալիս ավելի շատ ձայներ հավաքած քաղաքական ուժին ԱԺ-ում կազմել մեծամասնություն: Դա իրականացնելու արդյունավետ տարբերակներից մեկը հակաիշխանակա քաղաքական ուժերի միավորումը խաթարելն է, ինչն իրականացնելուն էլ, ըստ էության, կոչված է նոր և վաղուց հայտնի կուսակցությունների «վերածնունդը» ընտրություններից առաջ:
Մի խոսքով՝ քաղաքական դաշտում նկատվող ատոմիզացիան բխում է իշխող կուսակցության շահերից: Սա մարտահրավեր է ընդդիմադիրների համար և գալիք ընտրությունները ցույց կտան՝ որքանով են նրանք ի զորու հաղթահարել այն: